Drayber nadat-ogan sa karga

CEBU, Philippines - Patay ang multicab drayber dihang natagak sa pangpang ang gimaneho niining sakyanan nga puno sa karga nga coco lumber sa barangay Cogon Cruz sa siyudad sa Danao niadtong Miyerkules.

Ang biktima mao si Carlos Malunhaw, nagpuyo sa Sityo Catadman sa  barangay Sabang sa Danao City.

Subay sa imbestigasyon ni SPO1 Renante Manulat ang traffic investigator sa Danao City Police Station nga nahinabi sa Banat News ang biktima gikan sa Sityo Manlayag barangay Patag.

Puno kini sa karga nga coco lumber bisan og usa ka pasaheroan ang iyang multicab ug tungod sa ka puno sa karga wala na mosakay pa ang helper niini. Samtang nagdagan ang sakyanan paingon sa Poblacion ug pag-abot sa maong lugar sa kurbadahong bahin  sa dalan nawad-an og kontrol si Malunhaw sa manobela ug nalahos padulhog sa pangpang.

Gibanabanang moabot sa kapin sa 25 ka tiil ang giladmon sa pangpang nga gikahagbongan sa multicab nga nag-una ang dulong niini.

Tungod sa kabug-at nadasok sa ulo ug bukobuko sa drayber ang mga karga niyang coco lumber.

Patay na kini pag-abot sa Danao City District Hospital. (/EIM) (BANAT NEWS)