Mga motorista makasinati og kahasol

CEBU, Philippines - Makasinati og dakong kahasol ang  mga motorista ug sumasakay nga mobiyahe  tali sa  dakbayan  sa Lapulapu  ug  mainland Cebu karong  gisugdan  na pag-ayo  sa Department of Public Works  and  Highways (DPWS)   ang  duha  ka taytayan  nga nagsumpay  sa mga dakbayan  sa Mandaue  ug  Lapulapu.

Kini ang gipadayag ni Cesar Ylanan sa buhatan sa Traffic Enforcement Agency of Mandaue  (TEAM) nga nahinabi sa Banat News.

Matud pa niya nga matag higayon nga adunay  dalan sa dakbayan nga  sirad-an  masinatian  sa tanan ang kahasol  sa dagan  sa trapiko  ug  magkapuliki  usab  ang  mga   traffic enforcer  sa pagbantay   sa dagan sa mga sakyanan.

Dugang pa niya nga  ang hinay   nga  dagan sa mga sakyanan sa sayong kabuntagon ug hangtod na sa hapon   maoy  masinatian  sa tanan  di lamang  sa  mga  pampublikong  sakyanan  kundi  bisan  pa  sa  mga  pribado.

Si  Engineer Renult Ricardo nga maoy tigpamaba sa DPWH 6th Engineering District    mipahibawo  nang  daan  nga ayuhon  sa mga  tinugyanan  sa DPWH   ang Marcelo Fernan Bridge ug  Ist Mactan Mandaue Bridge.

Matud pa niya nga  may  mag-aspalto  aron matabonan  ang  mga  libaong  ug may  manaod  usab  og  mga  piyesa  sa  mga  bahin  sa taytayan  nga  tauranan  og  piyesa  hinungdan nga ilang ipatuman ang temporaryo nga pagtak-op niini. (/WC) (BANAT NEWS)