NSO mohatag og libreng rehistrasyon ning buwana

CEBU, Philippines - Nagpadayon   karon  ang  mga  enumerator  sa  National  Statistics Office (NSO)    sa pagpatuman  og libreng rehistrasyon  sa  mga  molupyo  nga  moparehistro  og  bag-ong  natawo  nga bata,  rehistro  sa patay, rehistro  sa magpakasal  ug  sa mangayo  og  certificate  of no marriage  nunot  sa   kasaulogan  sa  civil registration  month  ning  buwan  sa Pebrero.

Matud  pa  ni Regional  Director Ariel E. Florendo  sa  NSO7  nga  ang  mga  NSO enumerator  maoy moadto  sa mga barangay hall sa tanang  kabarangayan  sa   rehiyon 7  aron adto  mangrehistro  sa  gustong  magparehistro.

Matud  pa  ni  Florendo  nga  gihatagan  nila  og  dakong kahulogan  ang  tema  sa kasaulogan  karon  nga  nagkanayon “civil registration, bringing  public  service  closer to the people”.

Samtang  gipahayag  usab  ni Cebu Provincial Statics Officer Fermo C. Diputado   nga  may  mga  enumerator  nga  dili  lamang  kutob  sa mga  barangay  hall  kundi  moadto  pa sa mga  eskuylahan  aron  pagpanglista  sa  mga  kabataan  nga  wala  pa  marehistro  sa NSO.

Matud  pa  ni Diputado  nga  pipila  ka lugar  nga  nasayran  nila  diin  ang  ilang  enumerator   milakip   sa pagpanglista  sa  mga  bata  nga nagtungha  sa eskuylahan  mao  ang  lungsod  sa  Cordova  ug  dakbayan  sa Sugbo.

Matud  pa  ni  Diputado  nga  pipila  sa mga  katarungan  nga  dili dayon  makaparehistro  ang  mga  ginikanan  sa ilang  mga  anak  mao  ang kaapiki  sa  kuwarta.

Samtang  gipasabot  usab  ni Florendo  nga  sa  pagkakaron  nga  may  mga balaod   na  nga  motugot  sa  pagkorehir  sa pagka-lungsoranon (nationality) sa usa ka  tawo  ug  bisan  sa tukmang  edad  niini.

Kini  mao  ang Republic Act 9048   nga  nalig-on  niadtong  tuig 1993, samtang  gumikan  gihapon  sa gitawag  nga clerical error  misipyat  ang  pagtala  sa sex kon  pagkatawo  sa  bata  o  kaha  pagtala  sa tukmang  petsa  sa pagkatawo  niini  makorehian  na  kini  pinaagi  sa Republic  Act 10172.

Busa  pinaagi  niining  mga balaora, gipasabot  ni  Florendo  nga  dili  na  kinahanglang  moadto  sa korte  ang  mga  hingtungdan  kansang  mga  papeles  sama  sa birth  certificate  ug  uban  pa  may  mga  sipyat  nga nagkinahanglang  usbon.

Matud  pa  niya  nga ang  buhaton  sa mga  hingtungdan  mao  na lang  ang  pag-fill-up  sa  mga  forma  nga  anaa  sa  buhatan sa NSO   alang  ning  maong katuyoan.

Midugang  usab  siya  nga  dili  na  usab  kaayo  problema  sa  mga  molupyo  sa kabarangayan  tungod  kay  may  extension  nga  opisina  ang  NSO  sa ilang  mga  lungsod  nga  gitawag  nga  Batch Request Quest System (BRQS).

Matud  niya  nga  sa tibuok  lalawigan  sa Sugbo  adunay  mokabat  og  36  ka BRQS  nga  anaa  sa nagkalainlaing  lungsod  nga  andam  moalagad  sa  mga  molupyo  nga  may  iparehistro  sa NSO.

Busa imbis  moanhi  pa  sila  sa  NSO  regional  office  mahimong  adto  na lang  sila  sa ilang  mga  BRQS  sa ilang tagsatagsa ka lungsod. (/WC) (BANAT NEWS)