Safety gi-kwestiyon road widening sa bukirang bahin sa Talisay ipahunong una

CEBU, Philippines - Konsehal sa dakbayan sa Talisay mopalabang og resolusyon nga mag-awhag kang Mayor Socrates Fernandez sa temporaryong pagpahunong sa operasyon sa road widening sa mga bukirang barangay sa siyudad.

Ang maong plano  ni Konsehal Danny Caballero mitumaw human sa nahitabong askidente niadtong Huwebes sa buntag diha sa sitio Tangub, barangay Lagtang kinsa si Letecia Alcoseba nakabsan sa kinabuhi human maigo sa bato nga miligid ug miangol kang Jovy Laborada.

Kahinumduman nga si Alcoseba ug Laborada sakay kini og habal-habal nga gimaneho sa kapuyo ni Laborada nga si Michael Briones gikan sa barangay Jaclupan paingon unta ngadto sa barangay Tabunok. Apan kalit lang miligid ang usa ka dakung bato gikan sa ibabaw’ng bahin sa lugar ug miigo ngadto sa mga biktima.

Ang road widening proyekto sa Department of Public Works and Highways (DPWH) ug ang QM Builder maoy contractor niini.

Si Caballero nga nahinabi sa mga tigbalita kagahapon nagkanayon nga kinahanglang mapaubos sa imbestigasyon ang nahitabong insidente niadtong Huwebes.

Matud ni Caballero kinahanglang masuta kung duna bay mga safety measures nga gi-implimentar ang kontraktor sa ilang operasyon aron wala nay lain pang aksidente nga mahitabo.

Midugang kini nga kaniadto pa nilang gikabalak-an nga dunay mahitabong aksidente tungod kay ang yuta sa naigo sa proyekto magsige man og dahili. Ang project manager sa QM Builder nga si Willy Abatayo nagkanayon nga duna silay mga safety measures nga gi-implementar ug ang nahitabo niadtong Huwebes usa lang gyud ka aksidente.

Ang QM Builder maoy miabaga sa mga pinansiyal nga kinahanglanon sa mga nabiktima.

Samtang ang kapitan sa Lagtang nga si Marc Ferdinand Bas nagplanong makigtigom tali sa QM Builder ug DPWH aron tukion ang posibilidad nga paghimo og laing temporaryong agianan samtang nagpadayon pa ang proyekto. (BANAT NEWS)