Tinun-an sa “Criminology” nga wanted nadakpan
CEBU, Philippines - Tinun-an sa Criminology nga nalambigit sa pagpanulis ug pagpusil patay nasikop sa kapolisan sa Lapulapu sa Brgy. Bankal human kini nagtago-tago sud sa unom ka bulan.
Ang nasikop mao si Gerry Serenio Jr., 19, residente sa Sitio Mahayahay sa maong barangay.
Matud pa ni Insp. Jose Nilo Abello ang hepe sa kapolisan sa Station 5 nakadawat sila og taho nga si Serenio anaa sa ilang panimalay sa Brgy. Bankal hinungdan nga mikuha kini sa kopya sa Warrant of Arrest nga giluwatan ni Lapulapu City RTC Judge Victor Teves ug gisikop ang suspetsado.
Atol sa maong operasyon nakuha sa kapolisan ang usa ka kalibre .45 nga may lima ka bala gikan ni Serenio.
Matud pa ni Insp. Abello, si Serenio gitumbok sa mga saksi nga maoy usa sa tulo ka mga tulisang nag-motor nga mitulis sa usa ka babaye nag-angkas sa usa ka motor sa Brgy. Bankal niadtong bulan sa Hulyo tuig 2012 sa gabii.
Apan dihang nagmagahi ang babaye gipusil sa mga suspek ang drayber nga si Francisco Aleser, 29, nga empleyado sa Lapulapu City Hall sa buhatan ni Lapulapu City Attorney Atty. Michael Dignos.
Gipangita pa usab ang duha ka kauban ni Serenio samtang kini gibalhog na sa karsel. (BANAT NEWS)
- Latest
