Sakop sa DepED pakasohan

CEBU, Philippines - Ang Office of the Ombudsman-Visayas mi-rekomendar  nga i-upgrade ang kaso batok sa mga opisyal sa Department of Education (DepEd) kalabot sa pagkapalit sa mga depektosong mga bangko ug lamesa sa mga eskuylahan.

Ang maong kaso may kalambigitan sa pagpalit sa maong mga gamit niadtong tuig 2007 nga giingong nakapa-alkanse sa gobiyerno og P 3,089,256.32 tungod sa mga depekto gikan sa P17,758,420.00 nga gahin alang sa pagpamalit niini.

Ang Deputy Ombudsman for the Visayas nga si Pelagio Apostol miaproba sa rekomendasyon ni graft investigation officer II, Alejandro Borden niadtong Enero 21, 2013.

Si Borden mirekomendar sa pagpasaka og kasong criminal graft ug four counts of falsification of public/official documents ug kasong administratiba alang sa misconduct/dishonesty batok nila ni Gervasia Sanchez, accountant II, DepEd Division sa Cebu; Judiana Corriente, OIC sa buhatan sa ASDS, DepEd ug Serena Uy, schools division superintendent.

Gawas niini girekomendar usab ang pagpasaka og kaso sa  mga miyembro sa Division Inspectorate Team nga sila si Teonilo Ibarra, Felix Mejas Jr., Tiburcio Paras, Romualdo Abella ug Uy.

Ang miyembro sa Bids and Awards Committee nga sila si Coriente, Abella, Norberto Torbeso, Daria Sarsalejo, Willie Adonay Jr. ug Uy girekomendar usab nga kasohan.

Ang maong kaso mitumaw dihang ang JEC Lumber ug Ramagal nga napildi sa bidding   mireklamo tungod kay sila maoy lowest bidders apan ang maong proyekto gi-award ngadto sa Gala Industries nga mao ang third lowest bidder.

Base sa report sa usa ka pamantalaan nga ang mga magtutudlo ug ginikanan sa kabataan mireklamo nga depektoso ang mga armchairs, teacher’s table ug desk nga gi-deliver tungod sa naglugsot nga mga lansang, kuwang og parte ang pipila sa mga bangko ug lamesa.

Ug imbes nga bolts base sa gi-order lansang lang maoy gigamit sa maong mga gamit. (BANAT NEWS)