50 ka abogado mopaluyo kang PJ Garcia

CEBU, Philippines - Nagpundok ang kapin sa 50 ka mga inilang mga abogado dinhi sa Sugbo aron pagpaluyo sa mga programa ni 3rd District Congressman Pablo John PJ Garcia kun mapili  siya sa pagkagobernador sa lalawigan sa Sugbo sa piniliay  karong  Mayo.

Ang  panagtagbo sa maong  mga  abogado nga  gitawag nga “Lawyers of Pablo John Garcia” (LPJ)  gihimo  didto  sa  Casino Español sa milabay’ng adlaw. Nag-una sa nahimong membro sa steering committee sa LPJ mao si Atty. Ferdinand Pepito ang presidente sa Integrated Bar of the Philippines (IBP) Cebu City Chapter.

Sumala  pa ni Atty. Pepito  nga ilang gisuportahan si Cong. PJ Garcia  ubos  sa One Cebu Party  kay  kauban  usab  nila  kini sa natad  sa  pagka-manlalaban  dinhi  sa   Sugbo.

Matud  niya  nga sila nagtuo nga  dako og purohan nga daghan  ang  mosuporta  kang  PJ kay  nakapundo  man  daan  ang  iyang  igsoon  nga  si suspended  governor  Gwendolyn  Garcia  og  mga lumalaban sa One Cebu.

Samtang si Atty. Heybory Herosa nga usa  usab sa membro sa steering committee sa LPJ miingon nga gawas sa ilang pagsuporta sa kadidatora ni PJ Garcia ang maong pundok may mga training  usab  ug   seminar  nga  ipahigayon nila  sa umaabot  nga  mga   bulan nga magsentro sa pagpalapad sa ilang kahibalo kalabot sa balaod ug programa nga himoon sa maong pundok.

Sa iyang bahin, si  PJ Garcia mapasalamaton kaayo sa nagpasiugda sa maong pundok tungod sa  pagsalig niini sa iyang liderato ug ingon man sa abilidad niini nga modumala sa kagamhanan sa lalawigan sa Sugbo. Samtang  ang kaatbang  ni  PJ nga si Atty Hilario “Junjun”  Davide III  mipasabot  nga nahan--ay   na  ang  tanan nilang  programa  sa Liberal  Party  alang  sa iyang  kandidatora.

Si Davide  nga napilde  kaniadto  ni  suspended governor  Garcia  sa milabay’ng election nagkanayon  nga padayon  ang  ilang  pakigsandurot  sa  mga  local  nga  opisyal  sa kalungsoran  ug kabarangayan  sa lalawigan  sa pagpahibawo  sa ilang  programa  de goberno.

Wala  hinuon  siya motukbil  og  mga  butang  agi  og  pasalig  ug panaad  sa katawhan  kay alang  kaniya  iya  na  kining  gipadangat  ngadto  sa mga molupyo  nga  ilang  naatubang  sa ilang  paglibutlibot  sa nagkalainlaing  lugar  ning  lalawigan. Matud  pa  ni  Davide  nga nasayud  na  ang  katawhan  sa lalawigan  sa iyang  tinguha  nga  modumala  sa Kapitolyo  ug  sa tibuok  lalawigan.

Midugang  siya  nga wala  siyay  pundok  sa mga abogado  aron  motabang  pagtuboy  sa iyang  kandidatora. Apan kining  tanan  unya  na  makita  ug  masukod kun unsay  pulso  sa kinabag-ang  bahin sa populasyon  sa Sugbo  sa adlaw  sa piniliay, sumala  ni Davide.

Gituohan  nga kining  panag-atbang  ni PJ Garcia  ug  Junjun Davide matawag  nga bugno  sa  mga  higanteng  politiko  nga  anhi makita  ang  tinuoray  nga  pulso  sa katilingban kun kinsay ilang  suportahan  tali  niining  duha  ka  kandidato  nga naggikan  sa managsilingang  lungsod  sa habagatang  bahin  sa lalawigan.  (BANAT NEWS)