Kuwarta ug taxi sa driver gisakiyo sa tulisan

CEBU, Philippines -  Midangop sa kapolisan sa Presinto 5 sa Mandaue City Police Office (MCPO) ang usa ka taxi drayber   kinsa  gitulis  sa wala  hiilhing  armadong  mga  tawo   didto  sa  dalan UN Avenue sa barangay Umapad, dakbayan sa Mandaue  sa miaging gabii.

Ang biktima mao si Bernabe Yhapon, 29, minyo nga taga dakbayan sa Sugbo ug drayber sa Cool Taxi  nga nagdala sa plate number GWP 814. Ang nagtulis  duha  ka  lalaki  nga  gibana-bana  niya  nga  nag-edad  pa o tag 20 anyos   nga kasarangan ra  og pamarug.

Si PO1 Melvin Pelayo sa kapolisan sa nahisgotang presinto nga nahinabi sa Banat News  miingon nga misakay ang duha ka tulisan sa iyang  taxi didto  sa dalan M.C.  Briones sa  barangay Tabok, dakbayan sa Mandaue ug nagpahatod   kini sa barangay Pusok, dakbayan sa Lapulapu.

Apan  matud  pa  sa biktima  nga  pag-abot  nila  sa  UN Avenue sa ubos nga bahin sa Marcelo Fernan Bridge, ang  usa  sa  iyang  mga  pasahero  kalit  mideklarar  nga tulis  unya  gikuha  dayon  ang  iyang  cell phone  ug  ang  agi  niya  sa pamasahero  nga  mikabat  og  P2,800 . Dihang  nakita  sa mga tulisan  nga wala na silay  mapupho  gikan  sa biktima gimandoan kini  sa pagkanaog  sa iyang  taxi .

Sa kabalaka  nga pusilon  siya  misugot  ra usab  ang  biktima  sa mandar  sa tulisan  nga nagtion kaniya  og  armas  ug  ang  usa ka tulisan  mao nay  mimaneho  sa taxi  ug  gipadagan  kini pahilayo  sa maong  dapit. Si Pelayo miingon nga ang biktima kinsa walay nahimo igo na lamang nga nagtan-aw sa iyang  taxi nga mipahilayo  kaniya  ug  milihok  usab  dayon  siya  sa pagpahibawo  sa kapolisan  sa maong  hitabo.

Matud pa niya nga  kagahapon  sa  alas 10:00 ang takna sa buntag  napalgan ang gimaneho nga taxi sa biktima  didto  sa  dakbayan sa Lapulapu  nga gibiyaan  usab  sa mga tulisan daplin  sa karsada.

Padayon  pa  nga gipangita  sa kapolisan  ang maong  mga  tulisan. (/WC)  (BANAT NEWS)