Pag-ayo sa flyover sa Mandaue nalangay

CEBU, Philippines - Ang kanunay nga pag-ulan maoy nag-una nga hinungdan sa kalangan sa  nagtrabaho sa Department of Public Works and Highways (DPWH) 7 alang sa pag-ayo sa mga guba nga bahin sa flyover sa  eskina Maguikay ug   M.C.  Briones sa dakbayan sa Mandaue.

Gumikan  niini  mihangyo  ang  mga kadagkoan sa DPWH 7  kang Mayor Jonas Cortes  nga  hatagan  una  sila  og  dugang  allowance  nga  mga  adlaw  tungod  kay  pito  ra man  ka  adlaw  ang gitugot  niini  sa mayor sa pag-ayo  sa nagusbat  nga  bahin  sa maong flyover.     Si Engineer Roy dela Cruz nga maoy project engineer sa  DPWH 7  mihangyo  kang Mayor Cortes ug uban pa nga mga lokal opisyal sa dakbayan  nga nagkinahanglan  pa sila  og  dugang  lima  ka adlaw  nga allowance  aron  matabunan  gayud  nila  og  semento  ang  hawanan  sa flyover  nga  nangalungag  na.

Gipadangat usab ni Engineer  Dela Cruz ang mao nilang hangyo ngadto sa buhatan sa Traffic Enforcement Agency of Mandaue (TEAM) nga gipangulohan ni Edwin Ermac alang sa padayon nga pagdestino og mga taffic enforcer nga maoy mopahapsay sa dagan sa mga sakyanan ug kalikayan ang panaghuot sa maong dalan.

“We just look for ways to repair the structure in order to meet the deadline,” matud pa ni Engineer  Dela Cruz sa iyang pamahayag.

Dugang pa niya nga gihimo pa nila ang paghawan sa daan nga aspalto nga maoy nagdala og dagko kaayong libaong ug napulo usab ka mga joints sa flyover  ang ilang gitangtang ug gihulipan nila og bag-o. Nunot sa maong hangyo nga lugway sa DPWH 7 ang pag-ayo sa nahisgotang flyover nga gikatakdang mahuman niadtong Pebrero  2 giuswag  ngadto sa Pebrero 8 niining tuiga.

Sa nasayran nga ang mokabat sa P9 milyones nga kantidad nga pag-ayo sa Maguikay flyover maoy bahin sa P35 milyones  nga gahin alang  sa northern highway ug Hagnaya Wharf sa lungsod sa San Remegio. (BANAT NEWS)