5 ka sakop sa Salisi gang priso

CEBU, Philippines - Nadakpan sa kapolisan ang lima ka sakop sa Salisi gang nga taga Dasmarinas, Cavite kinsa  mibiktima  sa usa ka  Korean national  sulod sa Duty Free Shop sa barangay Umapad, dakbayan sa Mandaue sa miaging  hapon.

Si PO2 Rolandan Balimbing sa Investigation Detection and Management Bureau (IDMB) sa Mandaue City Police Office (MCPO) miila sa mga nadakpan nga sila si Simplecio Conde, 43, Avelyn Gemino, 24, Kenteh  Bugarin, 22 ug Ramil Santos, 42 nga pulos taga Dasmarinas, Cavite.

Matud pa ni PO2 Balimbing nga ang gibiktima sa maong mga suspetsado  mao   si Lee Kyungae, 48  nga temporaryong nagpuyo sa maong dapit.

Ang team sa  mga  polis  nga misikop  sa  mga suspek  gipangulohan ni Police Superintendent  Josepino Ligan nga maoy hepe sa Criminal Intelligence Bureau  (CIB) sa MCPO.

Dugang pa ni PO2 Balimbing nga namalit sa sulod sa Duty Free Shop ang biktima ug  misulod usab ang lima ka mga suspetsado kinsa nagpakaaron-ingnon usab  nga mamalitay og  imported nga mga produkto.

Gitaparan sa usa sa mga suspetsado ang biktima ug gikuha ang Samsung galaxy cell phone niini nga nagkantidad og P30,000 ug dihang nakuha na kini nagdali sila sa pagpanggawas ug misakay og taxi.

Nakurat  ang biktima sa kalit nga pagkawagtang sa iyang butang busa midesider  kini  sa pagpangayo og  panabang sa tagdumala sa maong tindahan.

Unya gikuyogan kini sa guwardiya sa maong tindahan   ngadto  sa  buhatan sa kapolisan.

Si PO2 Balimbing miingon nga gitan-aw nila ni Superintendent Ligan ang footage sa CCTV camera sa maong tindahan ug nakita nila ang mga panagway sa mga suspek kinsa  giila  nga sakop  sa   Salisi gang nga ania karon sa Sugbo.

Sa gihimo nilang follow up operation  pinaagi sa  pagsuhid  sa mga  simbahan  ilang nataymingan ang lima sa atubangan sa City Hall sa dakbayan sa Sugbo  busa  sa walay  langan  gisikop  dayon  nila  ang  mga suspek ug gibalhog sa bilanggoan. (BANAT NEWS)