Fishery code giumol sa konseho sa Mandaue
CEBU, Philippines - Ang konsehao sa dakbayan sa Mandaue miumol og usa ka ordinansa nga magpakgang sa mga mananagat nga mogamit og modernong klase sa panagat sa maong dakbayan.
Gibase ang maong ordinansa sa reklamo sa mga mananagat sa Mandaue kinsa gilupig sa mga mananagat nga gikan sa laing lugar kansang mga ginamiton sa panagat modern na kaayo busa daghan kaayo sila og masipong nga isda itandi sa taga Mandaue nga kinaraan lang gihapon ang ilang ginamiton sa panagat.
Ang maong kahimtang maoy nakaaghat kang Konsehal Jimmy Lumapas sa pagpalabang og ordinansa alang sa pag-umol og fishery code sa kagamhanan sa maong dakbayan.
Si Lumapas nga maoy chairman sa committee on agriculture nagkanayon nga ang maong ordinansa gisugdan na sa pagtuki sa konseho busa may gipahigayon na nga mga public hearing niadtong miaging adlaw.
Sa public hearing nga gipahigayon ilang gitataw ang ilang teritoryo ug ang utlanan niini tali sa kadagatan sa dakbayan sa Lapulapu ug sa kasikbit nga lungsod sa Consolacion.
Dugang nilang gituki mao ang pagpaubos usab sa bayranan sa mga mananagat nga magparehistro sa ilang sakayan o pump boat ngadto sa kagamhanan alang niadtong mga gagmay nga mananagat.
Ang pipila ka mga mananagat gikan sa barangay Paknaan, barangay Labogon mipalanog sa ilang nasinatian nga dili na gayud kasaligan ang panginabuhi nga panagat karong panahona ug dako na kaayo og kalainan kun itandi sa nangaging katuigan.
Hinuon ang panagat gibangkilyahan usab nila og pamanday aron kun magnihit ang ilang kuha sa dagat makapalit lang gihapon sila og bugas pinaagi sa pamanday.
Gawas sa panagat , mamasahero usab sila pinaagi sa traysikad ug bisan unsa na lang ilang kapanguwartahan basta mabuhi lang. Sa nasayran sa Banat News gikan sa buhatan sa City Agriculturist Office sa Mandaue nga mokabat sa 200 ka pamilya sa dakbayan ang misandig sa panagat isip ilang panginabuhi. (BANAT NEWS)
- Latest
