Kawani sa barangay priso

CEBU, Philippines - Anaa karon sa bilanggoan sa Cebu City Police Office (CCPO) ang usa ka kawani sa Barangay San Roque (Ciudad) nga gipasanginlan nga nalambigit niadtong anomaliya nga giingong dunay kalihukan ang mga senior citizens sa barangay, apan nasakpan nga dili tinuod kay hasta ang patay na miapil pagtambong.

Ang akusado nga si Lucia Sumampong, hingkud ang panuigon, lumulopyo sa Barangay San Roque, mitataw nga dili tinuod nga dunay kalihukan ang mga senior citizens sa ilang barangay kaniadtong Hulyo 17 ngadto sa 23, 2010 sigun sa gipatuo ni Barangay Kapitan Rogelio Ruizo.

Wala makabayad si Sumampong sa P30,000 nga pyansa nga gimando ni Regional Trial Court (RTC) Judge Soliver Peras mao nga gipriso siya ug anaa karon sa Camp Sotero Cabahug. Miadto unta si Sumampong sa hukmanan aron mopyansa, apan wala siya makakuha og bonding company nga mopyansa kaniya.

Si Kapitan Ruizo ug ang mga konsehal sa Barangay San Roque unang gipasakaan og kaso ni Lidiore Miranda kinsa nagtoo nga ang giingong kwarta nga gigasto sa lima ka adlaw nga kalihukan gibulsa ra sa maong mga opisyal.

Unang gipasanginlan ni Ruizo ang Gender and Development (GAD) focal person sa barangay nga si Ligaya Britania nga maoy responsable nga ang ngalan sa namatay na nga kanhi kapitan Telesforo Rabaya naapil sa lista.

Apan si Britania mitumbok usab ni Sumampong nga utility worker sa barangay nga maoy nag-andam sa supporting documents sama sa ngalan sa mga nanambong sa maong kalihukan.

Si Miranda nagkanayon nga nasakpan g’yud ang pagbulsa sa kwarta sa barangay human nga si Sumampong mitataw pinaagi sa iyang counter-affidavit nga dili tinuod ang pangangkon ni Kapitan Ruizo nga dunay kalihukan ang barangay sa mga senior citizens kaniadtong Hulyo 2010.

Matud ni Sumampong nga dili usab tinuod nga siya ang naghikay sa kwestyonable nga dokumento nga naglakip sa ngalan sa namatay nila nga kapitan kay hasta ang ngalan sa duha niya ka anak giapil, apan sayop ang spelling sa ilang ngalan.

Gawas ni Sumampong ug sa tanang opisyal sa barangay, ang GAD focal person nga si Ligaya Britania giapil usab sa kaso nga anaa pending pa sa hukmanan.

Sila hinoon sa pagka karon gawasnon human makabutang og pyansa alang sa ilang temporaryo nga kagawasan. (BANAT NEWS)