Naglakaw gipusil patay

CEBU, Philippines - Patay na nga  miabot  sa tambalanan ang usa ka lalaki human  kini  pusila   samtang naglakaw sa karsada didto sa Sityo Bayong barangay Inayagan, siyudad sa Naga niadtong miaging kaadlawon.

Ang biktima nailhan sa mga miresponding mga polis nga si Angelo Tapdasan, hingkod, ug molupyo sa barangay Guindarohan, lungsod sa Minglanilla.

Samtang ang suspek gihulagway lang sa mga saksi nga nagsakay og motorsiklo.

Si PO3 Antonio Albete sa Naga City Police Station mibutyag  sa Banat News   nga  ang biktima nakit-an  sa mga molupyo sa maong lugar nga naglakaw subay sa barangay road.

Matud pa gikalitan lang kini og sakdap sa nagsakay  usab og   motor  dayun gipusil pipila  ka higayon.

Dihang  nahagsa  na  sa yuta  ang  biktima dali kaayong  miikyas  ang  kriminal busa  wala  na  kini  hiabti  sa kapolisan nga mirespondi  sa maong  alarma.

Samtang  naabtan  pa  sa  mga  otoridad ang  biktima  nga  nagtinga-tinga  pa    nga  naglunang  sa kaugalingon  niyang  dugo.

Dihang  gisusi  sa kapolisan  , ang  tuong dughan   ug    walang  bukton maoy  nasabak  sa mga  bala.

Gidali  paghatud sa  tagtungod  ngadto  sa  Vicente Sotto Memorial Medical Center (VSMMC) sa dakbayan  sa Sugbo  ang biktima apan gideklarar kini ni Dr. Danny Castro nga Dead on Arrival (DOA).

Ang kapolisan nakapunit   og duha ka kabhang sa bala sa  kalibre .45 ug laing duha ka  lumping  na  nga bala  nga gituohan sa kapolisan nga gikan sa armas sa kriminal.

Ang kapolisan padayon pa sa ilang hot pursuit operation sa  pag-ila ug pagsikop sa  responsabli sa maong krimen. (BANAT NEWS)