Gidudahang himoanan og illegal gambling machines gi-ronda
CEBU, Philippines - Gidudahang himoanan og mga video karera ug mole-mole machines diha sa usa ka panimalay sa dalan San Roque sa barangay Hipodromo gi-ronda sa kapolisan.
Ang panimalay gipanag-iya sa usa ka Wendell Legaspina kinsa gidudahan sa kapolisan nga operator ug manufacturer og video karera ug mole-mole.
Ang mga sakop sa Regional Special Operations Group (RSOG) pinangulohan ni Chief Insp. George Ylanan armado sa search warrant nga giluwatan ni RTC-Branch 58 Judge Ma. Lynna Adviento sa ilang pag-ronda sa panimalay ni Legaspina.
Sa pakighinabi sa Banat News kang Ylanan mibutyag nga wala nila maabti si Legaspina apan ilang nakit-an ang mga kahimanan sa paghimo og video karera ug mole-mole.
Gisakmit sa kapolisan ang hooper machines, karera box, selector buttons, small monitors, coin slots, medium monitors, drill bits, screw drivers, soldering gun, hammer, sako sa mga assorted nga materyales nga gituohang gamiton sa paghimo og video karera machines ug mother boards niini.
Matod pa ni Ylanan nga anaa sa ilang listahan si Legaspina nga usa sa mga dakong tighimoay og mga video karera hinungdan nga ila kini nga gironda.
Sumala pa ni Ylanan apil na karon sa ilang mga target ang mga tinubdan sa mga makina sama sa mga manufacturers ug operators subay sa kamandoan ni Regional Police Office Director Chief Supt. Marcelo Garbo Jr. aron mahawan na gikan sa mga ilegal nga sugal ang lalawigan. (BANAT NEWS)
- Latest
