Jeepney nabalintong 9 angol

CEBU, Philippines - Siyam ka tawo ang nalandig sa Mandaue District Hospital human mabalintong ang ilang gisakyang jeep de pasaheroan pasado alas-4 sa kaadlawon kagahapon diha sa may Tipolo sa syudad sa Mandaue. Ang mga biktima mao silang Shamika Gonzaga, 2-anyos kinsa maoy nagrabehan; Jessie Gulane, 28; Lawrence Baron, 22; Arthur Sarveda, 39; Juana Llaguno, 29; James Jimenez, 28; Resel Sarda, 21; Mafe Torrejos, 22; ug Dawn Llaneta, 23.

Sa pakighinabi ni Mandaue Traffic Management Unit Field Investigator PO1 Nelson Sadile, mibutyag kini nga base sa iyang nakuhang impormasyon gikan sa mga pasahero nga diha pa lang sa may Mabolo ang drayber nga si Remuel Noval Pitogo susama sa wala na magsubay sa saktong dalan.

Gani, giingong mitipas ug mitungtong pa gyud kini sa gutter ug pag-abot sa maong lugar mao na lay namatngunan sa mga pasahero nga nagtakilid na ang ilang gisakyang jeep ug sa kalit lang natumba na kini.

Samad sa ulo, ug ubang parte sa kalawasan ang nahiaguman sa mga biktima samtang gihulagway ni PO1 Sadile nga ang 2-anyos nga batang babaye mao lang ang nagrabihan sa maong aksidenti.

Samtang, nasayran usab ni Sadile nga duha na diay ka adlaw nga wala mogarahe ang drayber ngadto sa operator hinungdan nga gipangita kini sa operator. Matud pa nga gibagat kini sa tag-iya apan nahitabo na ang aksidente, ang drayber dali usab kaayong miikyas ug gibiyaan ang iyang mga samarong pasahero.

Matud pa ni Sadile walay ensaktong pahuway ang drayber ug posibleng mao kini hinungdan sa pagkadisgrasya niini.

Samtang, matud pa ni Llaguno, usa sa mga pasahero, nga ang iyang nahinumduman mao lang nga mipidpid na sa kilid ang ilang gisakyan ug kalit kaayong natumba.

Kasamtangan pa karun nga gipangita sa kapolisan ang drayber nga misibat human sa maong insidenti.  (BANAT NEWS)