Telebisyon nga mibuto maoy hinungdan sa sunog sa Lapulapu

CEBU, Philippines - Mibuto nga telebisyon maoy usa sa gituohan sa kabomberohan sa dakbayan sa Lapulapu sa kalit nga pag-ulbo nga nakaingon sa sunog nga panimalay sa barangay Pajac, dakbayan sa Lapulapu alas 3:30 ang takna sa hapon niadtong miaging adlaw .

Si  SFO1 Atelano Berido, imbestigador sa kabomberohan sa maong dakbayan miingon nga ang nasunog nga balay gipanag-iya ni Cora Quer kinsa giingon nga kasamtangan karon nga nagbakasyon sa nasud sa Japan.

Matud pa ni Berido nga si Christina Barcial maoy gibilin nga caretaker sa maong panimalay.

Sa pagsukitsukit ni Berido kang  Barcial kini mibutyag nga nakadungog kini og buto ug gisundan kini og itom nga aso. Dugang pa ni Berido nga nangayog panabang si Barcial sa iyang mga silingan kinsa nagtinabangay usab sa pagpawong pinaagi sa paghakot og tubig gikan sa gripo ug gibubo ngadto sa nagsugod na unta nga pagdilaab nga kalayo.

Giangkon ni Barcial nga gikandadohan ang main door sa maong panimalay dihang nahitabo ang sunog maong nangatkat sila sa terasa dala ang binaldeng tubig aron ibubo sa kalayo.

Matud pa ni Berido sa ilang pagtan-aw sa second floor sa nasunog nga bahin sa panimalay ilang nadiskubrehan nga gi-plug pa ang telebisyon nga maoy ilang gituohan nga maoy nakaingon sa maong sunog.( /EIM) (BANAT NEWS)