Lalaking dunay deperensiya naghikog patay

CEBU, Philippines - Patay na nga napalgan nga nagbuy-od diha sulod sa ilang panimalay ang usa ka tawo kinsa giingong naghikog pinaagi sa pagpusil sa iyang ulo mga alas 5:00 pasado sa hapon niadtong miaging adlaw sa barangay Santa Rosa, dakbayan sa Danao.

Ang amahan sa namatay mitug-an ngadto sa mga polis nga nagbaton og kakulian sa pangisip ang namatay ug gani kanunay kini nilang namatikdan nga maghinuktok.

Si PO1 Roselo Campo sa kapolisan sa maong dakbayan miila sa namatay nga mao si Jovy Bacalso, 39-anyos, minyo nga nagpuyo sa maong dapit.

Matud ni Campo nga sa sayo pa sa buntag sa maong adlaw gidala unta sa asawa ang maong namatay niining bana sa pag-adto sa sikbit nga barangay alang unta sa pagpamista ngadto sa ilang mga kabanay.

Dugang ni Campo nga nagdumili sa pagkuyog sa asawa ang namatay ug nagpabilin lamang kini diha sa ilang panimalay kay gusto lang kining magpalabay sa oras nga mag-inusara.

Ang 9-anyos nga anak nga lalaki sa namatay nga gikan pa sa iyang tulunghaan maoy daling nagpahibalo ngadto sa ilang mga silingan kinsa mao usab ang nanawag  og polis.

Si Campo miingon nga sa ilang pakisusi sa patay’ng lawas ni  Bacalso maoy ilang nasuta nga nakabaton kini og bugtong samad pinusilan sa ulo ug tupad sa nagbuy-od nga patay’ng lawas ang kalibre .38 nga revolver nga adunay bugtong usab nga kabhang sa bala nga ilang gituohan nga maoy gigamit sa paghikog.

Ang mga kabanay sa namatay  giawhag sa mga polis nga ipaubos  sa autopsy ang patay’ng lawas sa pagsuta sa hinungdan sa kamatayon o may foul play ba o wala ang kamatayon niini.  (BANAT NEWS)