Naligo sa sapa 7 anyos nalumos

CEBU, Philippines - Patay na nga napalgan ang 7 anyos nga  batang lalaki human kini malumos samtang  naligo sa   sapa  sa Sityo Kalangitan, barangay Buanoy lungsod sa Balamban niadtong Martes sa alas 9:00 sa buntag.

  Ang biktima mao si Gino Juanilo Modeno, 7, tinun-an sa Grade One sa Buanoy Elementary School ug nagpuyo sa Sityo Kamanggahan sa maong barangay Buanoy.

Si PO1 Johnrell Romero sa Balamban Police Station mibutyag  sa Banat News nga ang biktima uban sa iyang maguwang nga 10 anyos ug laing usa pa ka higala nga bata, nangaligo  sa maong sapa niadtong  Lunes sa hapon  nga wala mananghid  sa ilang ginikanan.

Apan ang maguwang nga 10 anyos mao na lay nag-inusarang  miuli sa  ilang  balay human  mawagtang  sa ilang  gikaligoan ang biktima.

Gumikan  sa kahadlok  sa bata,  wala  kini  motug-an  sa  nahitabo  apan  dihang  gipugos  sa  mga  ginikanan  mitug-an  kini  niadto  nang  pagka-Martes  sa buntag.

Gipangita  dayon  sa  mga  ginikanan  ug uban  sa mga  molupyo  nga nakabangal  sa  biktima,  ila  kining  napalgan  nga nagbuy-od daplin sa sapa nga patay  na  kansang  senina didto  ra  sa kasagbutan  nga  bahin  sa maong  dapit.

Nasuta  usab  sa kapolisan  nga  misusi  sa dapit  nga  nalumsan  sa bata  nga lawom  ang  tubig  ug gituohan  nga  didto  kini  mosawom  apan  gumikan  kay  dili kaantigong  molangoy, hinungdan  nga nalumos ang biktima. (BANAT NEWS)