MCIAA ipasingil sa mga estudyante

CEBU, Philippines - Si Lapulapu City Mayor Paz Radaza miawhag sa mga tinun-an sa dakbayan sa Lapulapu nga motabang paghangyo sa tagdumala  sa tugpahanan sa maong  dakbayan  sa pagbayad sa ilang P1.5 bilyones  nga buhis ngadto sa siyudad.

Kini ang unod sa mensahe  sa  mayor  atol  sa seremonyas  sa pagtunol  sa bag-ong edipisyo  sa tulunghaan   ngadto sa tagdumala sa  Marigondon National High School  nga  gitambongan  sa kagatosan  ka  mga  estudyante.

Matud  pa  ni  Radaza  nga  ang  maong  estraktura  gigastohan  pinaagi sa pundo  sa Special Education Fund (SEF) sa dakbayan  ug  labaw  pa  untang  makapatukod  ang  kagamhanan  og  dugang  pang  mga  school building  kun makabayad  ang  Mactan Cebu International Airport Authority (MCIAA)  sa ilang  utang  sa buhis.

Mipasabot  si  Radaza  nga  usa sa katungdanan  sa local nga kagamhanan mao ang pagpatukod og dugang classroom alang sa mga   estudyante  nga nagkaanam   na  og  kadaghan  matag tuig.

Hinoon nagpasalamat   siya  sa mga pribadong sector ug mga foundations  sa katilingban nga mihimo usab sa ilang social responsibility  pinaagi sa pagdonar og mga classroom ug  mga school building  alang   sa dakbayan sa Lapulapu.  

Apan  miingon  ang  mayor  nga dako unta og ikatabang   alang  sa gahin    sa edukasyon ang ilang kolektahonong P1.5 bilyones   nga  buhis  sa MCIAA.

Miingon  si  Radaza  nga  dili  lang  kay  mga  building  sa eskuylahan  ang  matukod  niini  kundili  bisan  ang  panginahanglan  sa  mga  magtutudlo  kagahinan  usab.      

 Gumikan niini gihangyo ni Radaza ang mga tinun-an   nga  motabang  sila  sa pagpaningil   sa MCIAA  alang  sa kaayohan  sa  edukasyon  sa dakbayan pinaagi  sa  pagpadala  og suwat hangyo o petisyon ngadto sa mga opisyal sa MCIAA nga mobayad na sa ilang buhis  aron makatabang  sila  sa mga  tinun-an  sa Lapulapu.

(BANAT NEWS)