CEBU, Philippines - Si Police Officer 1 Carby Clyde Alinsug kinsa nakapusil kang PO2 Marciano Suarez Jr. sulod sa Toledo City Police Station human mibuto ang iyang .45 nga pistola giingong dili na mag-atubang og kasong kriminal.
Kini human mibalibad si Suarez sa pagpasaka og kasong reckless imprudence resulting in physical injuries. Apan si Suarez mihangyo kang Alinsug sa pagtabang kaniya sa gastuhan sa Visayas Community Medical Center sa siyudad sa Sugbo. Si Sr. Supt. Henry Biñas, hepe sa Toledo City Police Station, mibutyag nga si Suarez mi-down og P25,000 sa VSMC kung diin siya gidala.
“Dili na lang mokiha si Suarez pero magpatabang lang siya sa gastuhan kay maluoy man gud siya unya wala tuyua,†matud ni Biñas.
Si Biñas midugang nga ang Regional Investigation and Detection Management Division (RIDMD)-7 mao nay mopahigayon og pre-charged evaluation batok kang Alinsug.
Kahinumduman nga ang .45 nga pistol ni Alinsug kalit nga mibuto sa dihang iyaha unta kining limpyuhan adtong Biyernes sa hapon sulod sa opisina.
Si Alinsug anaa sa Field Training Program samtang si Suarez nadestino sa maong lugar kay lakip kini sa Night Watch Patrol.
Naigo si Suarez sa walang bukton niini human ang bala miigo sa salog sa Provincial Public Safety Company. Si Biñas midugang nga si Alinsug makagawas na sa prisuhan human sa ilang kasabutan. (BANAT NEWS)