Bawal ang Epal gilusad sa DSWD

CEBU, Philippines - Ang Department of Social Welfare and Development (DSWD) dili pa dugay milusad og "Bawal ang Epal" nga kampanya sa pagprotiher sa kahinlo sa programa sa gobiyerno alang sa mga kabos nga Pantawid Pamilyang Pilipino Program (4Ps).

Sumala pa ni Aileen P. Lariba, tigpamaba sa DSWD-7 nga ubos sa programang 4Ps nga ang ati-epal nga kampanya naumol tungod sa taho nga ang nagkadaiyang mga politiko ug grupo migamit sa 4Ps nga programa aron paghulga sa  mga benepisyaryo  nga hikawan  kini  sa tabang  kun dili  mobotar  kanila  sa  umaabot  nga eleksyon.  Dugang pa ni Lariba nga ang maong kampanya direktang motangtang sa sayop nga pagtoo sa mga benepisyaryo kalabot sa lakang  sa  mga politiko   sa pagkontrolar kanila  pinaagi  sa programa  nga 4Ps.

Gipadayag ni Lariba nga kining maong kampanya gitumong sa paghatag  og  gahum  sa mga benepisyaryo uban sa kaalam nga walay si bisan kinsa nga makapatangtang sa  benepisyaryo gikan sa maong programa kundi ang buhatan sa DSWD sa rehiyon 7 lamang.

Matud  niya  nga ang DSWD lamang  ang may katungod sa pagpadagan  sa 4Ps  ug  walay labot  si bisan  kinsang  politiko ning maong  programa ug  walay katungod  ang  bisan  kinsang  politiko  sa pagkontrolar  ning  maong  programa.

Sa pagkakaron ang 4Ps nga programa sa DSWD kasamtangan nagsilbi sa 2.5 milyones ka mga kabos nga pamilya  ug mihatag og binilyon ka pesos  nga abag  ngadto  sa sector  sa labing mga kabos sa nasud. Gibutyag ni Lariba nga kun adunay makasakop og mga politiko nga migamit sa 4Ps nga programa sa DSWD aron makakuha og botos  sa mga benepisyaryo niini kinahanglang direktang isumbong kini  ngadto sa ilang buhatan pinaagi sa pagtawag o kaha sa pagtext sa numero nga 09189122813. (BANAT NEWS)