Motorista nga magtabok-tabok sa CSCR sa habig sa San Isidro Talisay nabalaka

CEBU, Philippines - Mga drayber sa traysikol ug bisan na mga pasahero nagbagulbol gumikan sa kabalakang madasmagan sila sa mga naghaguros nga mga sakyanan sa ilang pagtabok sa Cebu South Coastal Road (CSCR) habig sa eskina sa barangay San Isidro sa dakbayan sa Talisay.

Ang mga drayber miingon nga magpaturagas ra og padagan ang mga saksayan sa maong dapit bisan kini crossing ug silang mga manabok panguyawan gumikan niini.

Usa sa nakadugang pa sa problema mao ang gubaon nga traffic lights sa maong lugar nga hangtud karon wala tagda o wala mahikutar sa City of Talisay-Traffic Operation Development Authority (CT-TODA).

Gi-awhag nila ang CT-TODA nga pangitaan og solusyon ang maong problema bisan pagbutang nalang og traffic enforcers nga maoy mo-kontrol sa dagan sa trapiko mentras wala pa maayo ang traffic lights sa maong dapit.

 Kahinumduman nga diha sa nahisgutang lugar ubay-ubay na ang aksidente ang nahitabo ug duna nay mga kinabuhi ang nakalas, sagad sa madasmagan mao ang mga motabok nga sakyanan diha sa crossing.  Si Almond Keith Dela Peña sa CT-TODA sa pakighinabi niini sa Banat Manobela nagkanayon nga magbutang na sila og tulo ka enforcer nga ibutang diha sa eskina sa San Isidro nga magmando sa trapiko.

Gawas niini kagahapon sa hapon gisuwayan usab ni Dela Peña og ayo ang ang program sa maong traffic light nga una nilang gi-rason nga maoy hinungdan sa pagkaguba sa traffic lights. (BANAT NEWS)