SM mokolekta na’g electric bill sa Veco

CEBU, Philippines - Pormal na ang kasabotan tali sa Visayan Electric Company (VECO) ug SM City pinaagi  sa  pagpirma og usa  ka Memorandum of Agreement (MOA) alang  sa naulahi  nga mahimong  kolektor sa nahauna. Ang kalihukan sa pagpirma sa MOA kalabot  niini gipahigayon didto  sa Radisson Blu Hotel sa North Reclamation Area, dakbayan sa Sugbo sa miaging adlaw.

Sa maong  kasabotan, ang SM City maoy third party collection (TPC) partner sa VECO. Ang  pagkolekta  sa mga  bayad  sa electric  bill  sa Veco  himoon  sa  SM department store, Savemore and Hypermarket karong umaabot buwan sa Nobiyembre.

Si Sandro Aboitiz, billing and collection manager sa VECO nagkanayon  nga ang pagbaton nila og collection partnership gitumong aron  sayon  nalang sa ilang  mga customer  ang  pagbayad  sa bayranan  niini  sa kuryente.

Sa samang  higayon  giawhag  sa tagdumala  sa VECO ang  ilang  mga  customer sa pagbayad sa ilang bill  sa tukmang petsa  aron  dili  sila makabayad  og  tubo  niini  o kaha  maputlan  sila  sa suga.

Mahimo  usab  silang mohatud  sa ilang  bayad  ngadto  sa  VECO Full Service Center nga nahimutang sa 2nd level sa SM City, Cebu, South National Highway sa barangay Bulacao, dakbayan sa Talisay, Talamban Collection Office sa Piazza Elesia, Gov. M. Cuenco Avenue, cor. Cabancalan, Talamban, Consolacion Collection Office sa Ermac Arcade, Cansaga, Consolacion ug Liloan Collection Office sa Highway Poblacion, Liloan.

Gawas  sa mga collection office ug Full Service Center pwede usab nga adto mobayad sa mga  bangko  gitugotan  sa Veco sama  sa  Union Bank, RCBC, Banco De Oro, Bank of Commerce, Metrobank ug Citibank ug sa mga  collection partner  sa Veco  nga  mao  ang  Star Bayad, 2GO, EC Pay, Cebuana Lhuillier ug CIS Bayad Center. (WC) (BANAT NEWS)