Investors midangop sa NBI tungod sa pagdudang scam ang ilang nasudlan

CEBU, Philippines -  Kinse ka mga nagdudang nabiktima sa investment scam ang midangop sa buhatan sa National Bureau of Investigation (NBI)-7 ug mireklamo batok sa Adszens Broker Corporation kagahapon aron magpatabang human wala nila madawat ang ilaha untang kitaon sa ilang investments.

Usa sa mga investors mao si Raffy Torneros, 52, nga taga Cebu City. Matud niya ni-invest siya sa maong kumpanya og P10,500 niadtong Septiyembre 2012, ug karun gusto niya nga makuha pagbalik ang iyang kwarta human ang maong kompanya wala na mohatag pa sa ilang “collectibles” ug mga produkto nga kabahin sa package sa P1,500 “entry” o pasiuna nilang investment.

Ang mga produkto nga giingong apil sa package naglakip sa napulo ka solar energy sticker, usa ka alkaline stick, napulo ka organic soap ug upat ka bottles sa barley.

Si Torneros miingon nga sukad siya ni register sa www.adszens.com niadtong Septiyembre, 2012 wala siya’y nadawat nga produkto o bisan na ang collectibles sa iyang investment.

Iyang nahibaw-an nga nanirado ang Ramos branch sa maong kompanya niadto pang bulan sa Disyembre nga walay pahibalo kaniya.

Misuwat usab ang ubang investors sa management nga kuhaon o bawion nalang nila ang ilang na-invest nga kwarta apan giingong pulos lang saad ang nahitabo.

Tungod niini midangop sila sa NBI aron ma-imbestigar kung scam ba ang ilang nasudlan.

Ang main branch sa Adszens nahimutang sa 4th floor, Savers Mall, Edsa Rotonda, Pasay City.  (BANAT NEWS)