CEBU, Philippines - Maglisod na unya og duwa og basketball ang usa ka lalaki human siya tigbasa sa nagsilbing scorer sa ilang duwa diha sa basketball court sa Borgonia St., Barangay Mabolo Huwebes sa gabii. Ang biktima nga si Jamil Dantes ang diriyot mapuo ang mga tudlo ug nasamdan pa sa iyang siko ug abaga human siya tigbasa ni Arnel Migullas, kapin 30 ang pangidaron.
Matud pa sa biktima, nagduwa og basketball kuyog iyang ig-agaw nga si Hanzel Judilla ug uban pang mga higala alas-8 sa gabii sa dihang mireklamo si Judilla sa referee nga si Simpson Agoot II, 40, nga dili kini patas modesisyon.
Ang maong pasangil ang nakapasuko kang Agoot ug iyang gisumbag si Judilla tungod niini mitabang si Dantes sa iyang ig-agaw apan si Migullas bisan walay apil sa away mikuha og 17-pulgadas nga sundang.
Pagkakita ni Dantes sa sundang misuway unta kini og dagan apan nagunitan ni Agoot ang iyang tiil hinungdan sa iyang pagkatumba ug diha na gitigbas ni Migullas sa walang abaga, ug sa pagpunay og sagang nangaputol ang mga tudlo niini sa tuong kamot, ug sa iyang walang siko.
Ang biktima nakabarog ug nidagan palayo sa maong lugar ug milahos sa Cebu City Medical Center samtang ang suspek nga si Agoot ang nadakpan sa Mobile Patrol Group.
Nakaikyas usab si Migullas kinsa gidudahang kakunsabo sa pagpanikas sa referee.
Narekober sa pulis ang sundang ug usa ka kutsilyo gikan sa crime scene nga gituohang iya sa mga suspek. (BANAT NEWS)