Lapulapu anaa sa Comelec watch list

CEBU, Philippines - Giklaro ni Lapulapu City Mayor Paz Radaza nga wala na sa listahan sa COMELEC hot spots ang dakbayan sa Lapulapu.

Matud pa ni  Radaza nga kini pormal nga gipatin-aw  ni Lapulapu City Police Office Director P/SSupt. Rey Lyndon Lawas nga   ang Lapulapu  karon anaa  na lang  sa watch list sa COMELEC apan  dili  na  election  hot spot.

Miingon  ang  mayor  nga  gihangop  niya  ang  maong  kalamboan kay  nagpasabot  kini  nga  dili  na  kuyaw  ug gubot  ang  dakbayan  sa Lapulapu  sa piniliay karong Mayo 2013 gumikan kay wala man  siya’y  lig-on nga kontra sa politika.

Si  Radaza  dako  usab og pagsalig sa iyang kaatbang  sa  pagka -Mayor nga si Efrain Pelaez sa Liberal Party nga dili kini motisuk og kagubot atol sa eleksiyon.

Mapasalamaton usab  si Radaza   sa  mga dagkong ngalan sa politiko sa dakbayan sa Lapulapu nga misuporta gihapon  sa iyang subling pagpapili pagka-mayor sa dakbayan.

Ang katapusang politiko nga mitabok na sa ilang kampo  ni Radaza  mao si Basak Brgy. Kap. Isabelito Darnayla kinsa  nanumpa nga mosuporta sa administrasyon sa mga Radaza sa umaabot nga piniliay.

Gipasabot ni  Radaza nga ang kagubot niadto lamang panahon sa barangay election  diin nahitabo  ang  pagpangrapido sa barangay hall ug may  mga hulga sa mga kandidato, apan dili  na kini karon mahitabo gumikan sa panaghiusa sa mga political clan sa dakbayan sa Lapulapu. (/WC) (BANAT NEWS)