CEBU, Philippines - Gipanghingusgan sa kagamhanan nga suportahan ang dugang pang kalamboan sa produksyon sa ubi sa lalawigan sa Bohol. Kini pinaagi sa pagpanguna sa Department of Agriculture (DA)7 uban sa suporta sa mga mag-uuma, magpapatigayon ug pribadong institusyon sa maong lalawigan sa paglusad og mga programa nga may labot sa kaugmaran sa produksyon sa ubi.
Sa usa ka programa nga may labot sa Ubi Festival nga gipahigayon didto sa Bohol Cultural Center sa dakbayan sa Tagbiralan, miduyog ang DA7 sa maong kalihokan sa pagpanguna sa regional director niini sa kasadya sa mga Bol-anon.
Uban sa tema nga Gasa sa Kinaiyahan Latas sa Katuigan sa mga Bol-anon Giugmad ug Giampingan, ang usa ka programa gitambongan sa nagkadaiyang sector kansang gidaghanon milamwas sa Bohol Cultural Center diin gipahayag ni Gobernador Edgar Chatto sa Bohol nga ang ubi usa sa mga produkto sa kaumahan sa maong lalawigan nga nakahatag og dakong tampo sa kinitaan sa kagamhanan sa Bohol.
Matud pa ni Chatto nga kinaham kaayo ang ubi sa Bohol itandi sa ubi sa ubang lalawigan gawas sa Bohol, busa gipangita kaayo kini kanunay sa mga mamamalit dinhi sa nasud ug bisan sa gawas sa nasud. Midugang si Chatto nga ang ubi sa Bohol nahimo na nga tradisyon sa mga Bol-anon kay sukad pa sa ilang mga ginikanan daan na kining giampingan ug gihatagan og dakong bili kay gani kun mahulog kini sa yuta ila kining hagkan tungod kay ila kining giisip nga sagradong produkto sa kaumahan.
Sumala ni Chatto nga daghan ug nagkadaiya ang klase sa ubi sa Bohol ug usa niini mao ang Kinampay nga may talagsaong lami nga gitawag og aroma nga hilabihang humota nga sa higayong makakaon ang tawo magpangita na siya niini.
Nanghinaot si Chatto nga labi pa untang mohatag og suporta ang DA7 niini aron madasig ang mga mag-uuma sa pag-atiman sa maong matang sa produkto, ilang amumahon ug ampingan kay nakahatag kaayo kini og dakong dungog dili lamang sa Bohol kundili sa tibuok nasud nga Pilipinhon.
Busa masaligon si Chatto nga ang DA7 mohatag sa ilang suporta sa produksyon sa ubi sa Bohol ug siya usab sa iyang kaugalingon kanunay nga mamarayeg sa maong ahensya alang-alang sa dugang kalamboan sa ubi sa Bohol nga sakop sa rehiyon 7
Samtang sa bahin ni DA7 Regional Executive Director Angel Enriquez kini nagkanayon nga ang DA maoy kamot ug mata sa gobiyerno sa pagpalambo sa agrikultura sa nasud busa sa tanang higayon ang suporta niini anaa sa produksyon sa ubi sa Bohol kay mao lamang kini lalawigan sa nasud nga nabantog sa ubi ilabi na ang Kinampay.( /WC) (BANAT NEWS)