29-anyos gibulit og samad dinunggaban

CEBU, Philippines -   Patay nang nadangat sa tambalanan ang 29- anyos nga ulitawo human kini gidunggab napulo ka higayon sa iyang gikalalis nga higala sa barangay Lindogon sa lungsod sa Sibonga niadtong Miyerkules sa alas 9:00 sa gabii.

Ang biktima mao si Junnel Aliponga,29, molupyo sa nahisgutang lugar samtang ang suspek mao ang iyang barkada nga si Ludefred Dela Cruz, alyas Prokpro, 26.

Matud ni SPO1 Jaime Mendoza sa Sibonga Police  Station dihang nahinabi sa Banat News uwahing nakit-ang buhi ang biktima uban sa suspek nga nag-inom ug pagkahuman nag- iyahay sa pagpamauli.

Apan napalgan na lang ang biktima nga daghan og samad dinunggaban ug patay na pag-abot sa Carcar District Hospital, wala na usab igkita pa ang higala niining iyang gikainom.

Matud pa sa kapolisan atol sa pag-inom sa duha nadunggan silang nagkainitay og lalis. (/EIM) (BANAT NEWS)