Pope nasugamak sa kaugtas

CEBU, Philippines - Nasugamak  sa tumang  kaugtas  o  “too much depression” ang  Canadian  national  nga  naghuramintado  ug  mipusil  patay  sa  duha  ka  tawo, miangol  sa  laing  usa  una  magpusil  patay  sa ilang  kaugalingon sulod sa palace of Justice niadtong  Martes.

Mao  kini  panglangtaw  ni  Emmanuel  Hernani, usa  ka psychologist  nga  nakighinabi  sa  mga  tigbalita  kagahapon  kalabot  sa  duguong  hitabo sulod  sa Korte.

Matud  pa  ni  Hernani  nga  patay  na  si  John Huldridge Pope,  ang  mipatay  kang  Dr. Rene  Rafols  ug  manlalaban  Jubian Achas  ug miangol  kang  Fiscal Maria Theresa Casiño  apan  iyang  nasuta  pinaagi  sa gipakita  niining  kasuko,  nga  nawad-an  na  sa maayong  panimbang  sa panghunahuna  ang  maong  langyaw.

Miingon  si Hernani  nga malagmit  nadiskontento  si Pope  sa sistema  sa hustisya  sa nasud  ug  ang  iyang  pagtan-aw  sa  mga  tawong  nasuko  kaniya  nga  midaugdaog  kaniya  o  kaha  gilutos  siya  sa hustisya  sa Pilipinas.

Midugang  si  Hernani  nga ang  usa  ka tawo  nga anaa na  sa hilabihang  kaugtas  sa hunahuna  wala  nay  positibo  nga  plano  sa kinabuhi. Ang negatibo  niyang   panglangtaw  sa kinabuhi   maoy  misantop  sa iyang  pangisip  nga  nakapahimo  niyang  burong  ilabi  na  nga  wala  nay  nagmahal  kaniyang  mga  silingan. (BANAT NEWS)