Dugoong hitabo sa palasyo de hustisya

CEBU, Philippines - Nahimong dugoon ang adlaw nga Lunes sa Marcelo Fernan Palace of Justice dinhi sa Sugbo kagahapon human usa ka Canadian nga suspek sa nagtipun-og nga mga kaso ang namusil sa sulod sa sala ni MTCC Judge Branch -6 Pamela Baring Uy.

Ang napatay mao sila si Dr. Niel Rafols ug Atty. Juvian Achas, namatay usab ang suspetsadong langyaw nga si John Hodridge Pope, nga nangangkong kanhi journalist sa ilang nasud sa Canada ug kasamtangan nga nagpuyo sa Tuscana Condominium sa barangay Guadalupe ning dakbayan.

Samtang ang naangol usab si Cebu City Assistant Prosecutor Maria Theresa Casiño, nga kasamtangan karun nga giatiman sa Chung Hua Hospital tungod sa samad pinusilan sa iyang tangkugo.

Sa interbyu sa telepono sa Radyo Singko sa programang “Frangkahay Ta” kagahapon sa buntag pipila ka minutos human sa pagpamusil nila ni Atty. Frank Malilong, Atty. Briccio Boholst ug Atty. Omar Redula,  sa usa sa mga saksi nga si Atty. Eddie Rosello, misaysay nga nakig-estorya siya sa huwes niadtong tungora dihang kalit lang niya nadungog ang usa ka buto.

Sa paglingi ni Rosello mao na lang ang iyang nakit-an nga natumba nga si Dr. Rafols nga may agi sa samad pinusilan ug sunod nga pagbuto nahagba usab ang iyang higalang si Atty. Achas, si Achas maoy abogado ni Rafols sa kasong malicious mischief batok kang Pope.

Matud pa ni Rosello nga iyang gisapnay si Achas aron kini tabangon samtang nagpunay siya og panawag og tabang. Matud pa ni Rosello naglisod nga nakig-estorya pa kaniya si Achas.

Samtang si Sr. Supt Mariano Natuel Jr. ang officer-in charge sa Cebu City Police Office nagkanayon sa mga sakop sa media nga daling mikanaog si Pope human namusil sa branch 6 ug gipangita sila si Fiscal  Oscar Capacio ug Nicolas Sellon , giingong aduna usab kini reklamo batok sa duha.

Apan ang nasugatan ni Pope mao si Piskal Casiño ug iya usab kining gipusil tungod kay giingong naglagot usab kini sa maong piskal.

Matud pa ni Natu-el nga dihang misuway na unta og ikyas ang suspetsado naapsan kini ni PO1 Oriel Hagupit nga sakop sa Regional Police Safety Battalion nga nadestino sa Provincial Treasurer’s Office kinsa nakadungog sa butobuto maong dali kining miresponde.

Lakip sa miresponde mao si SPO2 Celso Rivera Jr. nga nag-escort sa usa ka gipasakang kaso diha sa korte.

Matud pa ni Natu-el gimandoan si Pope sa pag-ingon: "ibutang imong armas" apan giingong wala kini mopatuo maong gipusil kini.

Si Pope naigo sa tuong bahin sa ulo nga milapos sa walang bahin sa iyang dunggan, tuo ug wala nga bahin sa iyang paa ug walang kamot ug daling gidala sa Cebu Doctors Hospital apan alas 10:50 sa buntag nakabsan gyud kini sa iyang kinabuhi.

Apan matud pa ni SPO2 Rey Cuyos, imbestigador sa Homicide Section ilaha unang sutaon kung ang nakapatay kang Pope mao ba gyud ang mga polis tungod kay dunay nakitang  ilang gituohang “tattoing” sa samad pinusilan sa ulo niini. Base sa nakuhang impormasyon sa kapolisan, adunay 6- counts nga kasong malicious mischief sa branch 6 si Pope nga gipasaka ni Dr. Rafols, duna pa usab kini kasong grave threats diha sa Branch 1.

Midugang usab si Natu-el nga daghan usab og reklamo ang silingan ni Pope batok kaniya ug makadaghan nang higayon kining gireklamo diha sa Guadalupe Police Station.

Atol sa pagsusi sa gidalang bag ni Pope kagahapon dunay usa ka calibre .45 pistola ang nakuha gawas pa sa .357 revolver nga iyang gigamit sa pagpamusil sa mga biktima. (BANAT NEWS)