Kinatawo napisok sa bala

CEBU, Philippines - Kritikal  ang  kahimtang  sa  usa ka trabahante  sa barko  human nasabak  ang kinatawo niini   sa bala sa mipusil  kaniya    didto  sa barangay Tuburan Sur, dakbayan sa Danao  sa miaging  gabii.

Ang biktima mao  si Ramil Batican, 29, minyo ug canvasser  sa usa ka shipping line sa maong dakbayan.

Si PO3  Arnold Labine sa kapolisan sa maong dakbayan nga nahinabi sa Banat News miingon nga paingon na unta sa iyang trabaho ang biktima dihang kalit lang gisugat sa duha ka wala hiilhing lalaki nga nagsakay  og  motorsiklo ug  ang  naglingkod  sa likud maoy  mipusil  niini.

Dugang pa ni PO3 Labine nga dali  kaayong  miikyas  ang  mga  kriminal  human  matumba  ang  biktima  sa karsada  kinsa  nasabak sa tulo  ka  mga bala  sa armas  de fuego  nga wala  hisayri  ang  kalibre.

Matud pa ni PO2 Labine nga ang biktima nga naigo sa iyang paa ug kinatawo  dali nga  gidala sa pipila ka molupyo sa maong dapit ngadto sa Danao Provincial Hospital apan gibalhin usab  dayon  ngadto  sa Vicente Memorial Medical  Center sa dakbayan sa Sugbo

Si PO3 Labine miingon nga sa kasamtangan wala pa nila masayri ang  hinungdan sa maong pagpamusil   apan  padayon    pa  nilang  gipangita  ang  mga  kriminal. (/WC) (BANAT NEWS)