Mama ug masuso natumbahag buli

CEBU, Philippines - Patay ang inahan ug duha pa ka bulan niya nga anak human matumbahi sa puno-an sa buli ang ilang balay samtang nagpatotoy kini sulod sa ilang balay didto sa Sityo Spillway barangay Lanas siyudad sa Naga niadtong Huwebes sa alas 8:00 sa gabii.

Ang mga biktima mao si Maryjean       Tapasao, 19, ug duha ka buwan pa niining masuso nga anak nga si Keith Tapasao.

Matud ni PO1 Nilo Dacles sa Naga City Police dihang nahinabi sa Banat News subay sa inisyal nga imbestigasyon sa pagkahitabo,  ang inahan naghigda na sa kwarto  ug nagpatotoy sa anak.

Apan sa kalit lang natumbahan sa punoan sa buli tupad ang ilang balay ug nasentro ang duha sa punoan nga di magakos sa usa ka tawo ang gidak-on.

Ang balay sa mga biktima ginama lang sa light materials hinungdan nga maayong pagkahapla sa balay ug napiit ang duha.

Ang mga opisyal ug tanod na sa barangay maoy nitabang og ugkat sa inahan ug anak pinaagi sa paggabas ug pagputol putol sa punoan sa buli. Si Enrique Tapasao,44, amahan sa mga biktima mitug-an nga gipahibawo na lang siya sa nahitabo sa iyang anak ug apo sanglit didto siya sa iyang gitrabahoan nga stone craft.

Ang buli nahimutang sa luyong bahin sa balay sa mga biktima gibana-banang 20 metros gikan sa punoan ang nabali  niini nga maoy nahagsa sa balay.

Matud ni Enrique, 30 ka tuig na ang maong buli ug daghan nang nag-ingon kaniya nga kinahanglang putlon na kini kay delikado na nga matumba.

Si Kapitan Rey Arnoza sa Barangay Lanas, nagkanayon nga ilang sabotan sa konseho ang paghatag og financial assistance ngadto sa pamilya sa biktima.

Magpatabang usab sila kang Naga City Mayor Valdimar Chiong alang sa pagpangayo’g dugang hinabang sa mga namatyan. (BANAT NEWS)