Unsaon pagwagtang sa kamingaw ug kalaay sa senior citizen kun mag-inusara?

CEBU, Philippines -  Usa ako ka senior citizen, 83 na ka tuig ang panuigon, gitudlo ni Mayor Malou J. Loot sa Daanbantayan pagka-OSCA Head niadtong Abril 1, 2011, aron pag-alagad sa mga senior citizens sa 20 ka barangay sa lungsod.

Pagkahuman sa proyekto ni Mayor Loot pagtukod sa Senior Citizens Building, iyang gibalhin ang akong buhatan, gikan sa opisina sa DSWD ngadto sa maong building, nahimutang sa Barangay Pajo, usa ka silingang barangay sa Poblacion, usa ka kilometro gikan sa balay-lungsod.

Samtang among gikalipay nga aduna nay kaugalingong buhatan ang mga senior citizens  sa Daanbantayan, ang problema mao ang pagkalayo niini sa mga silingan. Ang labing duol nakong makita mao ang halapad nga wanang sa katubhan.

Sa panahon nga ako nagpahulay, akong gipensar kun unsay maayong buhaton  pagwagtang sa subrang kamingaw ug kalaay nga mao kanunay ang motugaw sa akong hunahuna.

Usa ka adlaw, nakahunahuna ako paghimo og flower garden sa nataran sa Senior Citizens building. Sa walay langan gisugdan dayon nako ang akong plano ug human ko mahawani ang lapad nga nataran gitamnan dayon nako og daghang matang sa tanom nga mamulak. Gisundan ko kini sa pagpamubo matag buntag ug hapon … ug karon hilabihan na ang pagpamulak.

Wala ako magdahom nga ang kahumot nga ipalid sa lab-as nga hangin gikan sa kabulakan makadani sa daghang buyog ug alibangbang ug ubang matang sa mga insekto nga moduol sa akong mga tanom aron mosupsop sa katam-is sa dugos sa akong mga bulak.

Ang pagsud-ong sa mga insekto nga maglupadlupad ibabaw sa akong mga tanom .. ang uban mosuyop sa duga sa bulak  samtang ang uban motangtang sa nadugmok og nalaya nga bulak … kining tanan … nakalingaw kanako.

Dugang niini, nakamatikod usab ako og laing mensahe gikan sa akong tanaman. Matag abot nako sa kiliran sa akong tanaman maoy akong makita nga magsayawsayaw ang akong mga tanom, duyanon sa huros sa mabugnaw nga hangin … ang mga dahon magkiaykiay.

Usa ka gabii, gipadamgo ako sa akong mga tanom nga ang ilang pagsayawsayaw timailhan sa ilang pagpangayog katahuran ug pagyukbo kanako … ingon man pagpasalamat sa akong gihimo nga pagmugna sa flower garden.

Kay kun wala pa kuno ako magtanom sa mga bulak dili unta sila makahigayon paglipay ug paglingaw kanako ug sa mga buyog ug alibangbang nga nagpahimulos sa katam-is ug kahumot sa mga bulak.

Alang kanako nga usa ka senior citizen dili maayo nga kitang mga senior citizen maghunahuna na lang kun kanus-a malarag ang mga dahong laya  kundili, maoy atong hunahunaon nga makatabang kita sa mga tanom pagpabuklad sa mga lapyong dahon ug sa bag-ong mga bulak.

Mao kini ang nakatambal sa akong kamingaw ug kalaay samtang nag-alagad sa mga panginahanglan sa senior citizens sa Daanbantayan.

Salamat Mr. Albarina sa imong tampo. Hinaut nga mamahimong panig-ingnan sa ubang mga senior citizens kining imong gihimo pagwagtang sa kamingaw ug kalaay nga usahay bation sa usa ka senior citizen. Ug ayaw kalimot paminaw sa Senior Citizens Hour sa dyRC, 648 kHz matag Sabado 4:00-6:00 pm. Tels. 4125249, 4125298.