Priso sulod sa PRO-7 detention cell naghikog
CEBU, Philippines - Nagbitay nga walay kinabuhi ang usa ka piniriso sulod sa karsel sa buhatan sa Police Regional Office-7 human kini gituohang naghikog pasado alas-11 sa miaging gabii.
Ang naghikog nailhan nga si Zacarias Ompad Esito alyas Karias, 50, nga taga barangay Libertad Norte sa lungsod sa Sagbayan, Bohol.
Sa pasiunang imbestigasyon sa kapolisan nasayran nga ang naghikog napalgan na lang nga naghikot og t-shirt sa iyang liog ug ang pikas tumoy didto na gihikot sa bintana.
Gisuwayan pa unta sa kapolisan og revived ang kinabuhi sa piniriso apan patay na gyud kini.
Sa report sa kapolisan, nasayran nga ang biktima nasikop sa kadagkuan sa Regional Special Operations Group niadtong Enero 12 ning tuiga didto sa Bohol pinasikad sa warrant of arrest gikan sa usa ka korte sa Zamboanga.
Matud pa nga gikatakda untang dad-on sa Zamboanga si Esito, apan gituohang duna kini gikahadlokan sa maong lugar maong nahimo niining maghikog.
Ang Homicide Section padayon pa sa imbestigasyon sa hinungdan sa paghikog ni Esito.
Gisusi pa usab sa camp commander sa PRO-7 kung dunay tulobagon ang mga polis nga nagbantay sa maong prisohan. (BANAT NEWS)
- Latest
