CEBU, Philippines - Nagduhaduha gyud si suspended governor Gwendolyn Garcia sa pagsayaw sa Sinulog karong Domingo sa kabalaka nga dili na unya siya makabalik sa iyang opisina.
Sa iyang pamahayag sa taga media si Garcia nagkanayon nga dili siya makasalig sa gipahayag ni acting governor Agnes Magpale nga tugotan ra siyang makasayaw sanglit mag-usab-usab ang hunahuna niini.
Nahadlok gyud si Garcia nga padlakan ang iyang opisina kun mogawas siya niini hinungdan nga gitun-an niya karon ang lakang nga iyang buhaton.
Apan nagkanayon siya nga kun makadisider gyud siya nga dili mosayaw sa Sinulog, ang iyang anak nga si manlalaban Christina Garcia Frasco maoy malagmit mohulip sa iyang dapit.
Apan iyang gipadayag nga seryuso kaayo siya nga mosayaw sa adlaw sa Sinulog apan gumikan lang sa kabalaka nga dili na siya makabalik sa Kapitolyo nagpabilin siya sa pagduhaduha.
Matud pa ni Garcia nga samtang wala pay Temporary Restraining Order (TRO) nga ipagawas ang Court of Appeals, pabor kaniya dili una siya mogawas sa iyang opisina. (BANAT NEWS)