Dalan palibot sa Mandaue City Hall sirad-an

CEBU, Philippines - Ang kadalanan  dapit sa city hall sa Mandaue   gitakdang  sirad-an karong hapon alang sa “Panagtagbo Festival.”

Matud ni Ret. Maj. Edwin Ermac, operations chief sa Traffic Enforcement Agency of Mandaue (TEAM) ang pagsirado sugdan sa akas 3:30 sa hapon hangtod sa sayo sa gabii.

Ang Panagtagbo festival usa ka pagsaulog sa panagtagbo sa mga sakop sa Sagrada Familia, diin si Senor Sto. Niño, Birhen sa Guadalupe moduaw ni San Jose, ang patron sa simbahan sa Mandaue kon National Shrine of St. Joseph.

Gipasiugdahan sa Taga Mandaue, Inc., sa unang higayon adunay pagahimoong street dancing contest sa pito ka mga contingent-barangays gikan sa may coliseum subay sa S.B. Cabahug St. diin mosunod ang “showdown” contest atubangan sa city hall.

Ang mga premyo, sa showdown, P100,000 unang ganti, P75,000 ika-duhang ganti ug P50,000 ika-tulong ganti. Adunay special awards alang sa best in “andas” ug  choreographer.

Matod ni Lito Fruelda, presidente sa TMI ang maong religious-cultural nga kalihukan gihimo isip halad ngadto sa Sagrada Familia. (BANAT NEWS)