Suliran sa karsada sulbaron ni Soco

CEBU, Philippines - Giduaw  ni magpapatigayon  Glenn Soco  ang  mga barangay  Magsico ug Tabionan  sa  bukirang bahin  sa lungsod  sa San Fernando ug  gisaaran  nga  buboan  niya  og  hinabang  ang  mga  molupyo  sa maong  mga  lugar.

Atubangan  sa mga  opisyal  sa maong  mga  barangay ug  kagatosan  ka  mga  molupyo  gipasabot  ni  Soco nga  ang  mga  gubaon  nilang  karsada  andam  niyang  ipaayo  sa panahon  nga  kahatagan  siya  og  higayong  makabaton  og katungdanan  sa lalawigan.

Nasuta  ni  Soco  nga  dugay  na  nga nag-antos  ang  mga  molupyo  sa maong  lugar  sa kagubaon  sa ilang karsada apan  wala  kahatagi og  solusyon  sa mga  opisyal  sa barangay  ug  sa lungsod.

Matud  pa niya  nga segun  sa giasoy  ni kapitan  Leo Baricuatro  nga  makaluluoy  kaayo  ang  kahimtang  sa mga mag-uuma  kansang  panginabuhi  gisandig  sa panguma  ug  sa pagpamuhi  og  mga kahayopan.

Sa ilang paghatud sa ilang  mga produkto  sa merkado  maglisud  sila  kay  way  mga sakyanan  nga kakargahan  niini  gumikan  kay  di makasukol  sa kagubaon  sa karsada  sa maong  lugar.

Matud  pa  ni Soco  nga andam  siya  hatagan  og  kasulbaran  ang maong  suliran  kay  mao  kini  ang  iyang  hatagan  og  unang pagtagad  sa higayon  nga  makalingkod  siya isip  bise  gobernador  sa lalawigan  human  sa eleksyon  karong  Mayo ning tuiga.

Si Soco  molansar  sa pagkabise  gobernador  ubos  sa Independent  Party ug  malaumon  nga  di  siya  hikalimtan  sa katawhan  sa  nagkalainlaing  lugar  sa lalawigan.

(BANAT NEWS)