Dutch gipusil sa sampot

CEBU, Philippines - Naangol ang Dutch human kini gipusil sa gidudahang  gun for hire diha sa iyang pinuy-anan sa sitio Tawitawi sa barangay Poblacion lungsod sa Dalaguete niadtong Lunes sa alas 8:30 sa gabii.

Ang biktima mao si Peter Josef Gorissen,65,  nagpuyo sa maong lugar ug dunay laing Pinay nga kapuyo.

Ang suspek nailhan hinuon sa kapolisan ug giilang mao si Lorencio Dayagonon, molupyo sa bukirang bahin sa sitio Malacurong sa barangay Usmad sa lungsod sa Argao.

Ang kapolisan aduna nay motibo nga gisunod sa maong kaso nga dako ang ilang pagtuong hinungdan sa pagpamusil sa biktima.

Matud ni SPO1 Veronico Centino, desk officer sa Dalaguete Police Statin dihang nahinabi sa Banat News ang biktima kauban sa iyang kapuyo nga si Glorian Ma.  Rissel ug witness nga si Corazon Hart Horn,31 paingon nang mopauli gikan sa Plaza sa lungsod sakay sa Isuzu Ford Everest SUV nga gimaneho ni Horn.

Pag-abot nila sa tungod sa pinuy-anan sa biktima ug sa pagkanaog nila  ni Gorissen naabot ang duha ka suspek nga sakay og kolor puwa nga Honda XRM nga motorsiklo.

Ang angkas mipusil dayon sa biktima duha ka higayun ug naigo kini sa iyahang sampot. Human niini daling mibalik sa motorsiklo ang gunman ug miikyas.

Ang biktima dali dayon gihatud sa tambalanan ug nakuha gikan sa iyang sampot ang usa ka slug.

Ang mga kauban ni Gorissen positibong miila kang Dayagonon kinsa mao usab ang unang misuway og patay sa biktima niadtong Disyembre 4 sa usa ka kan-anan sa barangay Balisong lungsod sa Argao.

Nasayran nga dunay daghang pending kaso sa korte ang biktima ug ang kanhi asawa niini may labot sa ilang mga kabtangan nga anaa karun sa posisyon sa biktima. (EIM)(BANAT NEWS)