Karambola sa pamilya, usa patay ug tulo angol

CEBU, Philippines - Problema sa pamilya miresulta sa kamatayon sa amahan ug pagka-angol sa laing duha ingon man sa suspek sa nahitabong dinunggabay sa miaging gabii sa  Barangay Suba, Samboan.

Giingong wala magkasinabot ang amahan nga si Eduardo Anoling, 55, ug ang anak niini nga si Dexter Anoling, 28, human mibalhin og puyo ang anak ngadto sa gamay nga payag duol sa panimalay sa amahan.

Kini maoy gikasuko ni Eduardo nga miresulta sa karambola sa duruha nga mitipi sa kinabuhi sa amahan.

Si Eduardo nakaangkon og samad dinunggaban sa liog nga maoy hinungdan sa kamatayon niini. Si Dexter nakaangkon usab og samad sa tiyan ug dughan human usab madunggabi sa amahan. Ang kaipon ni Dexter nga si Nancy Sena, 35, nakaangkon og samad sa walang bukton ug walang tudlo lakip na ang ig-agaw niini nga si Allen Dugaduga, 23, nga adunay samad sa tuong bukton human sila misuway sa pag-ulang sa duha.

Ang mga biktima daling gidala sa Don Mariano Jesus Cuenco Memorial District Hospital sa Malabuyoc apan patay nang nadangat si Eduardo.

Sila si Dexter, Dugaduga, ug Sena daling gidala sa Don Vicente Sotto Memorial Medical Center sa siyudad sa Sugbo.

Giingong mga alas 7:20 sa gabii naabot si Eduardo, nga nakainom sa panimalay niini ug naabtan pang nangaon ang asawa niini nga si Emilia, si Dexter ug Sena.

Si Eduardo ug Dexter giingong puro nakainom adtong higayona.

Matud SPO1 Niel Seno, alert team leader, nga nasuko si Eduardo dihang iyang nahibaw-an nga nibalhin og puyo si Dexter sa laing balay. Giingong tungod sa kasuko, giduot ni Eduardo ang ulo ni Emilia ug miingon “kini maoy gasugo ninyo?” nga maoy nasuk-an ni Dexter nga miresulta sa sinukliay og kumo sa duha.

Niining higayuna kalit nga mikuha og kutsilyo si Eduardo ug gidunggab si Dexter sa tiyan. Gisukmag usab ni Dexter ang amahan maong gidunggab niya kini duha ka higayon si Dexter diha sa dughan.

Dali nga mitabang sila si Dugaduga, Emilia ug Sena apan giapil sila og dunggab. Kalit nga gikuha ni Dexter ang laing kutsilyo sa lamesa ug gidunggab sa liog sa iyang amahan.

Nakuha sa kapulisan ang duha ka kutsilyo sa crime scene. Matud ni Seno mibalibad na si Emilia sa pagpasaka og kaso ngadto sa iyang anak nga anaa pa karon sa tambalanan. (BANAT NEWS)