86 Biktima sa Human trafficking naluwas sa PCG

CEBU, Philippines - Naluwas sa mga sakop sa Philippine Coast Guard sa Zamboanga ang 86 ka mga gidudahang biktima sa human trafficking niadtong adlaw nga Domingo.

Sumala pa sa Coast Guard ang maong mga tawo luwan sa duha ka fastcraft  diha Petro Bay Wharf sa Zamboanga City sumala pa sa report sa GMA News Online.

Ang Coast Guard nakadawat og impormasyon kabahin sa maong fastcraft nga ML Nurhina padulong nang molarga maong dali nagpasumangil ang Coast Guard og mandatory pre-departure inspection.

Diha nila madiskubrehi ang 50 pasahero,  nga 32 kanila mga lalaki ug 18 mga babaye ug ilaha kining gi-‘rescue.’

Tungod niini laing barko sa mao gihapong lugar ang gisusi sa Sea-Based Anti-Trafficking Task Force (SBATTF) ug gi-inspeksyon ang M/L Fatimaraiza, ug didto laing 36 ka mga gidudahan gihapong ipalusot ngadto sa ubang nasud ang ilang naluwas. Ang 86 gidala ngadto sa  Department of Social Welfare and Development Processing Center for Displacement (PCDC) sa Barangay Talon-Talon sa Zamboanga City.

Didto nahibaw-an nga nameleti og P2,500 matag usa ang mga pasahero sa usa ka tawong giila lang sa pangalan  nga “Abs” aron sila ihatud sa Sabah, Malaysia.  (BANAT NEWS)