P22 mil gisakiyo sa tulisan gikan sa foreman

CEBU, Philippines - Mikapin  sa P20 mil ang kantidad sa kwartang nadala sa duha ka wala hiilhing tulisan gikan sa usa ka foreman ug negosyante og PO cards   nga  gitulis  niini didto sa  sitio Dawis, barangay San Roque, dakbayan sa Talisay sa miaging Sabado  sa gabii.

Ang biktima mao si Armand Martinez, 31, taga sitio Antipolo, barangay Linao, dakbayan sa Talisay, plumber, ug foreman sa Triple Well nga nahimutang sa Kasambagan, Mabolo, dakbayan sa Sugbo.

 Sa imbestigasyon nila ni SPO4 Daniel Tarucan, PO3 Ferdinand Pablo ug PO3 Benedicto Lasque   nasuta nga si Martinez nagsakay  sa iyang motorsiklo  gikan sa dakbayan sa Sugbo paingon nang mopauli.

Apan pag-abot niini duol sa eskina sa White Road, sa barangay Inayawan, dakbayan sa Sugbo usa ka wala hiilhing lalaki  kalit lang miangkas sa  iyang  likud.

Dayon  may gition kini sa kilid  sa biktima  uban  sa mando  nga  dili  siya  pahunongon  hangtud nga naabot sila sa barangay San Roque.

Midugang  ang  biktima  nga  sa pag-abot  nila  sa San Roque  miingon  kuno  ang  tulisan  nga   “ayaw na lang palag bay para walay mahitabo nimo” ug dayon gikuha sa tulisan ang iyang  bag  nga  gisudlan  sa P19,250 nga kwarta nga bayad sa   mga PO cards ug P2,200 nga personal  niyang  kwarta.

Human  siya  kahimulboli  sa kwarta, mimando  na  usab  kuno  ang  tulisan  nga   paderetsuhon siya  ngadto sa dalan sa sitio Uldog, barangay Poblacion ug dayon  gipaliko siya sa tuo sa 6th Street sa Carmen Village.

Pag-abot sa maong lugar ang tulisan mimando  kuno  sa  biktima  nga  ipapiyong  niini ang iyang  mata.   

Matud  pa  ni Martinez nga samtang  gipiyong  niya  ang  iyang  mga  mata adunay laing motorsiklo ang miabot ug ang tulisan  misakay sa maong motorsiklo ug gibiyaan siya didto sa lugar.

Ang biktima  walay  nahimo  gawas  sa pagtaho  niini  ngadto  sa kapolisan.

Ang kapolisan   padayon  pa  sa pagpahigayon og follow-up nga operasyon sa maong insidente. (BANAT NEWS)