Trabahante natulisa’g P200 mil

CEBU, Philippines - Mikabat  sa P200 mil  ang nasakiyo sa  wala  hiilhing  tulisan  gikan  sa usa ka  kawani sa Mitsumi nga  gitulis  niini  didto sa Deca Homes sa brangay Sabang siyudad sa Danao niadtong Biyernes  sa gabii.

Ang biktima mao si Mary-ann Albio, 43, minyo ug kawani sa Mitsumi nga nagpuyo sa Deca Homes ,  kinsa  nag-sideline  usab og patanto sa   mga  kauban  niini.

Si PO3 Reynaldo Perez, desk officer sa Danao City Police Station mibutyag s a Banat News  nga ang biktima paingon  na  nga  mipauli  sa ilang  balay  gikan sa  trabaho sakay  sa usa ka habal-habal   dihang  pagkanaug  niya  sa  duol  sa ilang  pinuy-anan  giatangan  siya  sa wala  hiilhing  tulisan dayong  tion  kaniya  og  armas de fuego  ug  mipahibawo  nga  tulis.

Ang biktima nga nakalitan ug gibati og tumang kahadlok walay nahimo dihang gipugos og kuha sa tulisan  ang iyang bag nga itom nga maoy gisudlan sa P200 mil nga  binayad  kaniya sa  iyang  mga  suki.

Human  makuha  ang  iyang  bag, dali  kaayong  nakasibat  ang  tulisan  nga  nagdagan pahilayo sa maong  lugar. Ang  gihimo  usab  sa biktima mao  ang  pagsumbong  sa kapolisan  nga nagtibi.

 Ang kapolisan padayon pa sa ilang follow up operation sa  pag-ila  ug  pagsikop sa maong  tulisan. (WC)(BANAT NEWS)