Sunog sa Bulacao, lima angol

CEBU, Philippines - Onse ka-balay ang gilamoy sa kalayo samtang lain pang duha ang naguba human miulbo ang sunog sa sudlonon nga bahin sa sitio Laguna, Barangay Bulacao gahapon sa udto.

Lima ka-tawo, apil ang usa ka 10-anyos nga babaye ug ang tag-iya sa balay nga gigikanan sa kayo, ang giingong naangol tungod sa maong sunog nga gi-report ala 1:40 sa udto ug nakontrolar human ang 25 ka-minutos.

Si Insp. Jose Laurito, ang officer-in-charge sa Cebu City Fire Department, nagkanayon nga ang maong sunog didto nagsugod sa balay ni Marilou Ouano.

Matud pang  Laurito, ila pang subayon kung unsay hinungdan sa maong sunog apan ang mga silingan mibutyag nga nagduwa og posporo ang mga gagmay’ng bata ni Ouano.

Mukabat sa P300,000 ang danyos sa maong sunog.

Si Laurito nipasabot nga ang maong mga balay sikit ug ginama sa light materials.

Si Laurito nagkanayon nga naglisod sila og sulod sa maong lugar nga 300 pa ang kalay-on gikan sa karsada.

“Lisod i-penetrate kay gamay ang karsada. Ang mini-fire trucks ra nato ang makasulod, ang mga dagko didto ra kutob sa highway,” matud pa sa fire investigator.

Laing fire investigator, si SFO3 Emiliano Daño, ang miingon nga ang 10-anyos nga si Jessa Althea Saducas ang naangol human kini mapiit sa fire truck ug sa tricycle.

Si Daño nagkanayon nga ang drayber sa tricycle nagmaneho nga maka-atras pag-agi sa firetruck ug dayon pag-atras niini, niabante og balik ug didto kasangit sa luyo sa firetruck nga natunong usab sa pag-agi sa bata ug napiit ang iyang tuo nga siko. Ang bata gidala sa Miller Hospital.

Matud pa ni Daño, ila pang kuhaon ang pangalan sa lain pang duha nga giingong nangaangol ug nakaangkon og bun-og sa kalawasan samtang naninguha pagsalbar sa ilang mga butang, apil na si Ouano ug ang usa pa ka tuig nga anak niini.

Ang mga bata usab sa duol nga Bulacao Community Elementray School ang nag-panic ug nanghilak sa pagtuo nga maapil sila sa sunog.

Ang Grade 6 teacher nga si Anita Villaner nagkanayon nga pagkakita nila sa kalayo, ila gilayong gipagawas ang mga bata ug gipalinya sa gawas samtang nagpaabot og impormasyon sa kabomberohan. Ang ubang bata ang posibleng nakalusot ug nakagawas, ug posibleng apil na niini si Saducas.

“Nanga-rattle ug nanghilak na kay duol na man lagi ang sunog. Nangabot sad ang ilang mga ginikanan para kuhaon sila. Nahadlok sad gani mi, nagkurog gani akong tuhod,” matud pa kang Villaner.

Ang maong eskuylahan ang nagpahigayon og make-up class sa Kindergarten hangtod Grade 6 sukad pa niaging Sabado ug gahapon unta kini mahuman, sigon pa ni Villaner.

Ang sunog giisa sa kabomberohan ngadto sa second alarm ug nadeklarar nga fire out 2:54 sa udto.( EIM) (BANAT NEWS)