CEBU, Philippines - Mokabat sa usa ka gatos mil pesos ang nawagtang sa usa ka money changer sa dakbayan sa Mandaue human dunay usa ka lalaking nagpaka-aron ingnong nagpailis og kwarta nga uwahi na nilang nabantayang mga mini diay.
Ang biktima mao si Anthony Lauron, 34, nagpuyo sa Labangon dakbayan sa Sugbo ug maoy teller sa VHEZ Money Changer nga nahimutang sulod sa usa ka mall kilid sa Saint Joseph Parish Church.
Base sa imbestigasyon sa kapulisan, ang suspek nanawag sa money exchange shop ug miingon nga pailisan niini ang iyang kwarta nga 3,000 dolyares.
Matud pa sa kapolisan, si Lauron gisugo sa iyang agalong si Edwin Zulueta nga ipahatud ang P122,400 nga cash ngadto sa usa ka Atty. Miguel Cortes nga naghuwat sulod sa simbahan.
Apan sa dihang migawas na kini sa mall, adunay usa ka lalaki ang miduol kang Lauron ug nagpaila nga mao kini si Atty.Cortes. Human sa ilang mubo nga panag-estorya gikuha sa suspek ang kwarta ug gipapaabot ang biktima kay iyang adtuon ang inahan nga usa ka doktor nga nagpaabot sulod sa simbahan.
Apan nahibulong na lang si Lauron nga wala na mobalik ang maong tawo hinungdan nga midangop siya sa Mandaue City Police Office (MCPO).
Matud ni PO3 Marino Lauro sa Investigation and Detective Management Branch (IDMB), nailhan ra usab ni Lauron ang suspek gikan sa mga hulagway apan nagdumili sa pagtug-an si kinsa ang maong lalaki. (BANAT NEWS)