Panday gi-ulo pagpusil sa gikasumbagay nga gwardiya

CEBU, Philippines - Patay ang usa ka panday human kini gipusil sa iyang naka-away nga gwardiya pasado alas-3 sa kaadlawon diha sa QM Builders Compound, Pleasant Homes Subdivision barangay Punta dakbayan sa Sugbo. Ang biktima nailhan nga si Jose Zulueta, 36, molupyo sa Tubod, Dugo-an lungsod sa Dumanjug samtang ang suspetsado nailhan nga si Rafael Rondina, 41, usa ka gwardiya sa maong compound ug sakop sa Guisa Soty Security Agency.

Sa pasiunang imbestigasyon sa kapolisan,  dunay nakakita sa duha nga nagdungan og abot sa maong dapit nga pulos hubog ug naglalis ug pagkahuman nagsumbagay.

Tungod niini, ang mga kauban sa suspetsado nga si Felix Marinduque ug ang igsuon sa biktima nga si Alfredo dali usab nga mipakgang sa duruha.

Apan giingong nasikaran sa biktima ang suspetsado sa tiyan niini hinungdan nga nakabunot kini sa iyang armas nga kalibre .38 ug sa walay daghang pangutana iya kining gipabuto sa ulo sa biktima. Tungod sa maong pagpusil maayong pagkahagba sa biktima sa sementadong salog human maigo ang tuong bahin sa likod sa iyang ulo.

Gidali pa unta pagdala sa Adventist Hospital ang biktima apan patay na kini. Ang kapolisan padayon pa sa ilang imbestigasyon sa maong hitabo. (/EIM) (BANAT NEWS)