Pagpang-rehistro sa manguyog sa fluvial procession kutob lang sa Enero 15 — PCG

CEBU, Philippines - Ang Philippine Coast Guard (PCG)  nagsugod na sa pagpang-rehistro sa mga nagkadaiyang sakyanan sa kadagatan alang sa fluvial procession sa imahen ni Senior Santo Niño sa Enero 19 niining tuiga.

Si Cebu Coast Guard Commander Rolando Punzalan nga mitambong sa executive committee meeting sa miaging adlaw sa dakbayan sa Mandaue miingon nga kinahanglang magpa-rehistro ang mga sakyanan sa dagat nga buot mo-apil.

Ang permit adto kuhaon sa Maritime Industry Authority-7 aron masigurong luwas  sakyan sa mga tawo ang ilang mga bangka o lantsa nga mosalmot sa fluvial procession.

Ang Mactan Channel dili na paagian og mga barko sugod alas-4 sa kaadlawon hangtud sa alas-9 sa buntag aron dili mabutang sa peligro ang fluvial procession nga manukad sa Mandaue padulong sa siyudad sa Sugbo.

Si Atty. Paterno Acaboddillo miingon nga ang pagpangrehistro hangtod lamang kini sa Enero 15.

Sama sa gihapon, gidili ang pagdala og pabuto, overloading ug mga ilimnong makahubog sa mga mangapil sa fluvial procession aron kalikayan ang disgrasya. (/EIM) (BANAT NEWS)