Manghimoay og imahen sa Senyor Sto. Niño nga nasunogan ug namatya’g anak nangayo og tabang

CEBU, Philippines - Ang pamilya sa batang nalakip sa sunog sa sitio Hawod barangay Bulacao, dakbayan sa Talisay nanawagan nga unta tabangan silang makabarog sa pag-usab sa ilang panginabuhian.

Si Eliseo Tisoy Jr. amahan sa 3-anyos nga batang si Mark Lester kinsa naapil og kasunog sa ilang balay niadtong Lunes sa gabii nagkanayon nga maglisod na sila sa pagbarog  pagbalik sa ilang panginabuhian nga paghimo og mga imahen sa Senyor Santo Niño.

Matud niya nga mokabat ngadto sa P500 mil ang danyos tanan sa mga nasunog nga mga imahen nga order unta sa ilang mga suki lakip na sa ilang mga makina ug gani tapot lawas lang ang ilang nadala.

Gibutyag ni Tisoy nga ang tanan nilang puhonan hinuwaman nila sa ilang mga suki ug wala silay ikabayad niini karon. Kagahapon ang mga biktima sa sunog nagpasilong lang kini sa tent aron dili mangabasa sa uwan ug ang haya sa batang si Mark Lester gipahimutang kini sa lugar sa ilang balay nga nasunog.

Si Tisoy nagkanayon nga nagpasalamat sila sa mga tawong mihatag kanila og hinabang sama sa pagkaon ug uban pang nag-una nilang panginahanglanon.

Lakip sa mitunol og tabang sa mga nasunogan mao ang kagamhanan sa Talisay.

Sa laing bahin, si Yayoy Alcoseba, kandidato sa pagka-bokal sa unang distrito sa probinsiya mihatag og scholarship sa 9-anyos nga batang babaye nga si Rhea  Tisoy.

Si Rhea miluwas sa iyang usa pa ka tuig nga manghod nga lalaki dihang miulbo ang sunog diha sa ilang balay. Matud ni Alcoseba nakita nga talagsaon ang gibuhat sa maong bata ug angayan lang usab kining hatagan og pasidungog.

Si Rhea kinsa grade three na karon sa Bulacao Elementary School magsugod og pahimulos sa iyang scholarship karong pagbukas sa klase sa Hunyo ngadto sa Southwestern University sa Basak Campus hangtud nga matapos kini sa high school.

Matud ni Alcoseba nga kung hatagan pa siya sa kapiskay sa lawas kung mag-kolehiyo na si Rhea siya maoy mopatungha niini. Si Rhea mibutyag nga gusto niyang mahimong magtutudlo.

Ang pamilyang Tisoy gihatagan usab og pinansiyal nga hinabang ni Alcoseba ug ang ubang mga nasunogan gipanghatagan usab kini og bugas, delata ug mga noodles.

Si Rhea dihang nahinabi sa mga tigbalita nagpasalamat sa mga tabang nga ilang nadawat ug nanghinaot kini nga tabangan unta silang makatukod og balik og balay. (/EIM) (BANAT NEWS)