Tiyo gipatay sa pag-umangkon

CEBU, Philippines - Gumikan  sa bangi  sa yuta giliog pagpatay  sa pag-umangkon ang iyang  uyoan didto sa Sitio Kagudoy, Barangay Basak dakbayan sa Lapulapu sa milabay’ng hapon. Gawas  sa  dinunggaban  sa liog,  gisundan  pa gyud  sa walang  dughan, puro mga  dapit  sa lawas  sa tawo  nga  patyanan busa  wala  gayud masalbar  ang  biktima  nga  si  Quirino Umpad, 60, minyo, ug residente sa maong dapit.        

Samtang ang suspetsado mao si Jimmy Pepito, 31, ulitawo silingan  ug  pag-umangkon sa biktima.        

Sa imbestigasyon sa kapolisan nasuta nga sa wala  pa  ang  pagpanunggab, nagsusapinday   sa kahubog  nga  naglakaw  ang  biktima   nga miduol  sa suspetsado  nga  nagtagawtaw  uban  ang  pasingit  og  hagit-hagit  nga  nakapasuko  pag-ayo  sa naulahi.

Nasayran  sa kapolisan  nga  mga tulo  na  ka semana  nga  nagpasingitay  ang  duha  human  kini magkalalis  bahin  sa yuta.

Matud  pa ni SPO2 John  Carlo Jocotan  sa Lapulapu City  Police Station  nga human  sa maong  bangi,  naglagot  ang  suspetsado    kay   punayan  lang  kini og   kasaba  sa  biktima  matag  karon ug  unya  nga  magkakita  sila  ilabi  na  kun  kini  lasbag  sa bino.Ang dugay  nang  kalagot  nga  natigom,  gipagawas  sa suspetsado  dihang  naputong  na  siya  ug  nawad-an  sa pasensya  niadtong  tungora  nga  nakalimtan  niya  nga  uyoan  ra  niya  ang  iyang  gikaaway.Iyang  gilanit  ang  giluklok  niyang  kutsilyo  nga  may  11 pulgadas  ang  gitas-on  ug sa walay  kukaluoy,  gihansakan  niya  pag-una  ang liog   sa biktima  dayon  ang  walang  dughan  niini nga maoy  hinungdan  sa  hinanali  niining  kamatayon.Gisuwayan  kini  og  tabang  sa  mga  kabanay  apan  wala  nay  kinabuhi  nga  gihatud  ngadto  sa hospital.           

Human  masuta nga  patay  na  ang  biktima,  misirit  og  dagan  ang  suspetsado  apan  paingon  ngadto  sa barangay hall sa Basak  aron pagtahan  sa  iyang  kaugalingon.

Ang  kapolisan  na sa dakbayan maoy  mikuha  kaniya  ug gipaslak  sa prisohan  samtang  magpaabot  sa tukmang  kaso  nga  isang-at  batok  kaniya.       Matud pa ni Pepito  nga  wala siyay tuyo nga patyon ang iyang uyoan apan   nalimot  siya  sa  iyang  kasuko  gumikan  kay  kanunay  siyang  pasakitan  og  sulti  niini   matag  higayong  mahubog kini.  Hinuon  andam siya nga serbisyohan ang iyang silot agad  sa ipahamtang  kaniya  sa husgado, matud  pa  ni  Pepito.  (BANAT NEWS)