Haben giligid og kasaba ni Byron Garcia
CEBU, Philippines - Nanglipaghong si provincial administrator Eduardo Haben dihang giligid kini og kasaba ni kanhi Capitol consultant Byron Garcia, igsuon ni suspendidong gobernador Gwendolyn Garcia sa miaging Lunes.
Gumikan niini mibalhin si Haben og opisina aron dili na sulngon pag-usab ni Byron, sumala ni Acting Governor Agnes Magpale kagahapon.
Si Magpale atol sa interview sa Bantay Radyo nagkanayon nga mihangyo kaniya si Haben nga magpabalhin og opisina human siya sulnga dayon giligid og kasaba ni Byron.
Matud ni Magpale nga si Haben wala makaako pagsukol ug gani wala kini motubag-tubag bisan kun bug-at na kaayo ang mga gipamulong ni Byron kaniya.
Maoy hinungdan nga sugod kagahapon si Haben anaa na mag-opisina sa Legislative Building ug gibiyaan niini ang iyang buhatan sa karaang Capitol building.
Matud pa ni Magpale nga hapit molagum sa kauwaw si Haben kay gipamuyboy kuno kini ni Byron tungod sa pagsimpatiya niini ngadto ni Magpale ug giputol na niini ang iyang loyalidad sa suspendidong gobernador.
Nunot niiini gipabantay karon ni Magpale ang tanang departamento sa Kapitolyo kay basin sulngon kini ni Byron sama sa iyang gibuhat kang Haben. (WC)(BANAT NEWS)
- Latest
