Listahan sa bag-ong benepisyaryo sa 4Ps gipaabot

CEBU, Philippines - Ang Department of Social Welfare and Development (DSWD-7) nagpaabot sa  lista  sa mga idugang  nga  benepisyaryo sa Pantawid Pamilyang Pilipino Program (4P's) karong tuiga.

Sumala  pa ni Nemia Antipala, luyo-luyong Regional Director  sa Department of Social Welfare and Development (DSWD)7  nga ang  gitugotang  motunol  sa mga bag-ong  benepisyaro  sa 4Ps  ning tuiga  mao  ang  pribadong  grupo  nga akriditado  sa maong  ahensya. 

Miingon si  Antipala, tungod  sa kamahinungdanon  sa papel sa mga  grupo  nga  giotorisahan  sa DSWD sa  pagpanglista  niadtong  mga  pamilyang  kabus nga angay  himoong  benepisyaryo  sa 4Ps ila  kining  gihangyo  nga  paspasan  ang  ilang  survey ug  ihandos  sa buhatan  sa DSWD  ang  listahan  sa  mga  benepisyaryo  aron mahikay  dayon  sa  kagamhanan  ang  hustong  mga  lakang  alang  sa pagsalbar  sa  mga malistang         pamilya.

Usa  sa tumong  ning maong  programa  mao nga aron  mamenusan ang kagutom ug kalisod dinhi sa  komunidad, sumala  ni  Antipala.

Sa pagkakaron adunay  17 ka mga grupo nga nalambigit sa mga kalihokan sa pagpalambo sa mga kinabuhi sa mga pamilya o indibidwal nga susama sa mga benepisyaryo sa 4Ps.

Gipadayag ni Antipala nga ang mga makapahimos unya sa bag-ong 4P’s mao ang mga pamilya nga adunay mga anak nga biktima sa krimen, sama sa human trafficking, rape ug uban pa.

Lakip usab sa mga benepisyaryo mao ang mga pamilya nga adunay mga children with disabilities ug ang mga libud-suroy o mga street children.

Ang matag pamilya makadawat gihapon og susamang kantidad sa orihinal nga 4P’s; P500 alang sa head of the family og P300 kada bata matag bulan, sa di mulabaw og tulo ka bata.

Ang mga NGO’s o CSO’s nga gusto nga mahimo nga kaabag sa programa gikinahanglan nga musumiter og Updated Work and Financial Plan, Monthly Monitoring Report, Quarterly Accomplishment Report ug gikinahanglan nga lisensyado kini.( WC) (BANAT NEWS)